कास्की ।

पशुमा महामारीका रुपमा फैलिएको लम्पी स्किन रोगविरुद्ध जिल्लामा धमाधम खोप कार्यक्रम सञ्चालन भएको छ । महामारी फैलिँदासम्म खोप खरिदका लागि बजेट अभावले काम सुरु नभएकामा असार अन्तिम सातादेखि पशुमा खोप लगाउन सुरु गरिएको हो । पोखरा महानगरपालिका र ४ गाउँपालिका रहेको कास्कीमा सबै पालिकामा गरी हालसम्म १२ हजार ८ सय ५० गाई, भैँसी र गोरुलाई लम्पी स्किनको खोप लगाइएको भेटेरिनरी अस्पताल तथा पशु सेवा विज्ञ केन्द्र कास्कीले जनाएको छ ।

केन्द्रका प्रमुख वरिष्ठ पशु विकास अधिकृत शम्भुराज पाण्डेले सुरुआतमा बजेट अभावमा खोप खरिद गर्न नसकिएको स्वीकारे । उनले भने, ‘अन्य रोगको खोप कार्यक्रम सञ्चालन भए पनि लम्पीका लागि बजेट र खोपको व्यवस्था थिएन । असारको अन्तिम साता आएर बल्ल बजेट व्यवस्था भए पनि खोप खरीद गरेर खोप कार्यक्रम सुरु गरेका हौँ ।’

महामारी फैलिँदै जाँदा कतिपय व्यावसायिक फार्म आफैँले खोप किनेर समेत पशुमा लगाएका थिए । प्रदेश सरकारले लम्पी स्किनविरुद्धको खोपका लागि १० लाख बजेट जिल्लास्थित भेटेरिनरी अस्पतालमा पठाएको थियो । जिल्लामा हालसम्म १३ हजार ३ सय ७ गाई गोरु र ३ सय ३१ भैँसी पशु लम्पी स्किनबाट संक्रमित भएकामा ४ सय २९ को गाई गोरुको मृत्यु भएको छ ।

भैँसी भने यो संक्रमबाट मरेका छैनन् । पोखरा महानगरपालिकामा सबैभन्दा बढी पशु संक्रमित छन् । पोखरामा १० हजार २ सय ४२ गाई गोरु र २ सय ७१ भैँसी संक्रमित भएको केन्द्रका पशु विकास अधिकृत सहदेव पौडेलले जानकारी दिए ।

माछापुच्छ्रे गाउँपालिकामा १ सय ५० गाई गोरु र १२ भैँसी, अन्नपूर्णमा गाई २ सय १९ र भैँसी ७, रुपामा १ हजार ७ सय ८२ गाई र गोरु तथा १ भैँसी र मादीमा ९ सय १४ गाई र ४७ भैँसी लम्पीबाट सङ्क्रमित भएको कार्यालयले जनाएको छ ।

हालसम्म पोखरा महानगरमा ६ हजार ५ सय, माछापुच्छ्रेमा ३ हजार ६ सय, अन्नपूर्णमा १ हजार ४ सय ५० र रुपामा १ हजार ३ सय गाई, भैँसीमा खोप लगाइएको पौडेलले सुनाए । लम्पी स्किन गाई भैँसीलाई हुने संक्रामक रोग हो । लामखुट्टे, टोक्ने झिँगा र किर्नाजस्ता कीराको टोकाइबाट यो रोग सर्ने गरेको पशु स्वास्थ्य प्राविधिकको भनाइ छ । गर्मीयाममा लामखुट्टे र किर्ना आदिको सङ्ख्या बढ्ने र ती कीरा बढी सक्रिय हुने भएकाले यसको प्रकोप अझ बढी देखिन्छ ।

रोगबाट सङ्क्रमित गाईभैँसीको दूध उत्पादनमा तीव्र गिरावट आउनुका साथै उच्च ज्वरो आउने, तौल घट्ने र कहिलेकाहीँ मृत्यु पनि हुन सक्छ ।