पोखरा ।
अमेरिका लैजाने भन्दै विभिन्न देशमा पुर्‍याएर अलपत्र बनाएको अभियोगमा एकजनालाई प्रहरीले पक्राउ गरेको छ । काठमाडौंमा बस्दै आएका पोखरा २७ का ३४ वर्षीय कमल तामाङलाई प्रहरीको मानव बेचबिखन अनुसन्धान ब्युरोले पक्राउ गरेको हो ।

अमेरिका लगिदिने लोभलाचनमा पारी पीडितहरुलाई अन्यत्र देशमा लगि अलपत्र पार्ने, बन्धक बनाइ यातना दिने र फिरौती लिने जस्ता आपराधिक कार्यमा संलग्न रहेको खुल्न आएपछि तामाङलाई पक्राउ गरिएको प्रहरीले जनाएको छ ।

प्रहरीका अनुसार उनले चार जनाबाट २ करोड २६ लाख २३ हजार ८ सय ९० रुपैयाँ लिएका थिए ।

नेपालबाट अमेरिका लैजाने भनि भारतको नयाँदिल्ली, श्रीलंका, दुबई, सिंगापुर, फिलिपिन्स, थाईल्याण्ड, लाओस र जाम्बियालगायतका देशमा पुर्‍याई अलपत्र पारी थप रकम माग गर्ने गरेको अनुसन्धानको क्रममा खुल्न आएको छ ।

जिल्ला अदालत काठमाडौंबाट म्याद थप अनुमति लिई यस सम्बन्धमा प्रहरीले थप अनुसन्धान गरिरहेको छ ।