कास्की ।

दुईजना बालिका र एकजना महिलालाई कामदारको रुपमा राखी यौन व्यवसायमा संग्लग्न गराई यौन शोषण गर्दै आएको आरोपमा पक्राउ परेकी ३७ वर्षीया पार्वती काराखेतीलाई जिल्ला अदालत कास्कीले थप ५ दिन हिरासतमा राख्न अनुमति दिएको छ ।

साउन १८ गते पक्राउ परेकी काराखेतीलाई थप ५ दिन थुनामा राखेर अनुसन्धान गर्न आइतबार अनुमति दिएको हो । पोखरा महानगरपालिका– ८ सिर्जनाचोकमा काराखेतीले खाजा घर सञ्चालन गरी बालिकाहरु र महिलालाई यौन कार्यमा संलग्न गराएको भनी जिल्ला प्रहरी कार्यालय कास्कीले १८ गते पक्राउ गरेको थियो । जिल्ला प्रहरी कार्यालय कास्कीका प्रहरी नायब उपरीक्षक (डिएसपी) श्रवणकुमार विकले काराखेतीलाई ५ दिन हिरासतमा राखेर प्रारम्भिक अनुसन्धान गर्न अनुमति लिएले जानकारी दिए ।

बालिकाहरु र महिलालाई उद्धार गरी अनुसन्धान गर्दा खाजा घर सञ्चालिका काराखेतीले आफूहरुको इच्छा विपरीत यौन कार्यमा संलग्न गराउने गरेको प्रहरीलाई बयान दिएका छन् । पीडित बालिका र महिलाले अनावश्यक रुपमा मानसिक यातना दिने गरेको र यौन धन्दामा लगाउने गरेको उजुरीका आधारमा प्रहरीले काराखेतीलाई पक्राउ गरेको हो ।