जाेमसाेम—मुस्ताङको वारागुङ मुक्तिक्षेत्रमा कागबेनीमा कागखोलाको शाखा नदी थुनिएर आएको बाढीले त्यहाँको भौतिक संरचना तथा धनमालको ठुलो क्षति पुर्‍याएपछि सोमबार दिउँसो वारागुङ मुक्तिक्षेत्र गाउँपालिकाको विपद् व्यवस्थापन समिति र जिल्ला विपद् व्यवस्थापन समितिको संयुक्त बैठक बसेको छ ।

बैठकले कागबेनी बाढी प्रभावित क्षेत्रका स्थानीयबासीलाई तत्काल उद्दार ,राहत र व्यवस्थापन गर्न विभिन्न ८ बुँदै निर्णय गरेको छ ।
संयुक्त पालिका विपद् व्यवस्थापन समिति र जिल्ला विपद् व्यवस्थापन समितिले बाढी ग्रष्त प्रभावित क्षेत्रमा रहेका मजदुरहरुको उद्दारको व्यवस्थापनका लागि घरपझोङ गाउँपालिकालाई जिम्मा दिएको छ । घरपझोङले बाढीका कारण अलपत्र मजदुरको उद्दार ,राहत र व्यवस्थापनका लागि जोमसोम समाजघरमा स्थान्तरण गर्ने र उनीहरुलाई खाद्यान्न ,लत्ता कपडा र बन्दोवस्तीका सामान गाउँपालिका व्यवस्थापन गर्ने जनाईएको छ ।

प्रभावित क्षेत्रमा तत्काल खानेपानी,बिद्यतु र संञ्चार सेवा अवरुद्ध भएकाले त्यसको संञ्चालन गर्न व्यवस्था मिलाउने ,जोखिम र असुरक्षित रहेका घरहरुको धनमाल सुरक्षित स्थानमा राख्ने व्यवस्था मिलाउने निर्णय गरिएको छ ।

विपद्को संयुक्त बैठकले प्रभावित क्षेत्रको सार्वजनिक र निजी क्षेत्रको प्रारम्भिक आँकलन र मूल्यांकन गरी स्थानीय पालिका र सुरक्षाकर्मीको समन्वयमा निक्र्योल गर्ने , कागबेनी बाहेक सो पालिकाको वडा २ र ३ को छुसाङ,ताङ्वे, झोङ,पुडाक र छेङ्गुर लगायतका स्थानसंग जोड्ने मुख्य र शाखा सडक संञ्चालन गरी आवतजावत सहज बनाउन तत्काल पहल थाल्ने निर्णय गरेको छ ।

कागबेनी बाढी प्रभावित क्षेत्रको पूर्ण क्षति २९ घरसहित ३५ घरधुरीलाई तत्काल उद्दार,राहत र पूनथापनको लागि आवश्यक पर्ने सामाग्री नेपाल सरकार, गृह मन्त्रालय र विपद् व्यवस्थापन महाशाखा र एनईओसीलाई उपलब्ध गराउन अनुरोध गर्ने र बाढी प्रभावित क्षेत्रको ३५ घरधुरीलाई तत्काल राहत व्यवस्थापन गर्न आवश्यक टेन्ट,म्याटिस र कम्बल आदीको व्यवस्था मिलाउन र सोका लागि ईन्धनको उपलब्ध गराउन गण्डकी प्रदेश सरकार र प्रदेश विपद् व्यवस्थापन समितिलाई अनुरोध गर्ने निर्णय गरिएको छ ।