काठमाडौं ।
ललितपुरको भैंसेपाटीमा बनेका सातै प्रदेशका मुख्यमन्त्री र प्रदेश प्रमुखको आवास आइतबार हस्तान्तरण गरिएको छ । ठेक्का सम्झौता भएको ४ वर्षमा आवास निर्माण भएका हुन् ।

हाल अपार्टमेन्टमा बस्दै आएका मुख्यमन्त्री र प्रदेश प्रमुखहरु अब भैंसीपाटी आवासमा बस्ने छन् । गण्डकीका प्रदेश प्रमुख पृथ्वीमान गुरुङ र मुख्यमन्त्री सुरेन्द्रराज पाण्डे आवासको चाबी बुझेका छन् ।

विशेष भवन निर्माण आयोजना समन्वय कार्यालयका प्रमुख आयोजना निर्देशक मचाकाजी महर्जनले सोमबारबाट मुख्यमन्त्री र प्रदेश प्रमुख सरकारी आवासमा सर्ने दिए । अब बासस्थानको व्यवस्थापन सम्बन्धित प्रदेशहरुले नै हेर्ने छन् ।

केसी–समानान्तर जेभीले ७२ करोड ४७ लाखमा यी भवन बनाएको हो । भैँसेपाटीमा २७ रोपनी १२ आनामा निर्माण गरिएका ७ भवनमा १४ ब्लक छन् । जसमा प्रदेश प्रमुख र मुख्यमन्त्रीको सम्पर्क कार्यालयसमेत छन् । प्रत्येक ब्लकमा दुईवटा इकाई छन् ।

एउटा प्रदेश प्रमुख र अर्को मुख्यमन्त्रीका लागि बनाइएको हो । सबै भवन तीन तलाका छन् । यसअघि प्रदेश प्रमुख र मुख्यमन्त्री काठमाडौं आउँदा केन्द्र सरकारले अपार्टमेन्टमा मासिक झण्डै ९ लाख रुपैयाँ भाडा तिरेर व्यवस्था गर्ने गरेको थियो ।