पोखरा ।
पेशागत बिमा अभिकर्ता संघ नेपाल नेपाल लाइफ इन्स्योरेन्स कम्पनी लिमिटेड शाखा समिति पोखराको चौथो अधिवेशन तथा साधारण सभा भएको छ । अधिवेशनले अध्यक्ष दीपकप्रसाद पराजुलीको नेतृत्वमा सर्वसम्मत रुपमा नयाँ कार्यसमिति चयन गरेको छ ।

समितिको उपाध्यक्षमा मित्रलाल पौडेल, सचिव घनप्रसाद पौडेल, सहसचिव शोभा पोखरेल, कोषाध्यक्ष सोमबहादुर नेपाली रहेको कम्पनीका सिनियर एजेन्सी म्यानेजर नेत्रप्रसाद ढकालले जानकारी दिए ।

कार्यसमितिका सदस्यमा मञ्जु गुरुङ, राजकुमार गहतराज, लालुप्रसाद शर्मा तिमिल्सिना, कुन्दनकुमार मल्लिक, गमबहादुर गुरुङ, सुमन थापा, सिरुमाया गिरी, र दीपेन्द्र हमाल छन् । कार्यक्रममा पेशागत बिमा अभिकर्ता संघ नेपालका केन्द्रीय महासचिव ओमबहादुर केसीले नेपाल लाइफ इन्स्योरेन्स कम्पनीमा जस्तोसुकै भूकम्प गए पनि कर्मठ अभिकर्ता अर्को कम्पनीमा नगएको बताए ।

उनले अभिकर्ता कमिसन खानका लागि नभएर सचेत र संगठित हुनुपर्ने उल्लेख गरे । ‘बिमा अभिकर्ता संगठित नभए बिमितको सेवा सुविधा कटौती हुन सक्छ,’ उनले भने, ‘बिमितको सेवा, सुविधाको अलवा सदस्यको हकहितका लागि सँगसँगै लड्ने हो ।’ उनले संगठनलाई बलियो बनाउनुको साथै बिमा व्यवसायको समृद्धिका लागि काम गर्न सबैमा आग्रह गरे ।

नेपाल लाइफ इन्स्योरेन्स कम्पनीका गण्डकीका प्रमुख सहदेव अधिकारीले बिमा अभिकर्ता संघले बिमा व्यवसायको क्षेत्रमा अब्बल काम गरेको बताए । कार्यक्रममा नेपाल लाइफ इन्स्योरेन्स कम्पनी पोखराका प्रमुख उपेन्द्र तिमिल्सिना, पेशागत बिमा अभिकर्ता संघ नेपाल शाखा समितिका पोखराका अध्यक्ष तारादेवी बराल, कम्पनीका एजेन्सी म्यानेजर ढकाल, कार्यसमितिका सदस्य मोहनप्रसाद अधिकारी लगायतले बोलेका थिए ।