पोखरा ।
जिल्ला समन्वय समिति कास्कीका प्रमुख लीलाधर पौडेलले कास्कीलाई विकासमा नमुना बनाउने गरी काम गर्न कास्कीका स्थानीय तहका जनप्रतिनिधिहरूलाई आग्रह गरेका छन् । पौडेलले जिल्ला समन्वय समिति कास्कीको आयोजनामा स्थानीय तहका जनप्रतिनिधि वडा सदस्यहरूका लागि क्षमता अभिवृद्धि तालिमको समापनको अवसरमा सो कुरा बताएका हुन् ।

पौडेलले विकासका काम युग सुहाउँदो, समय सापेक्ष र वडामा विकास प्रभावकारी हुन नसकेको गुनासो सुन्नु नपरोस् भन्ने हेतुले कार्यक्रम आयोजना गरीएको उल्लेख गरे । उनले जनप्रतिनिधिहरूको सवलीकरणमा तालिम कोसेढुंगा सावित भएको दाबी गरे । प्रमुख पौडेलले विकासमा गुणस्तरीय सेवा प्रवाहमा स्थानीय तहका प्रतिनिधिहरूको यो कार्यकाल ऐतिहासिक र स्वर्णिम हुनुपर्ने र त्यही अनुसार तालिमबाट प्राप्त ज्ञान सिपलाई अब्बलरूपमा व्यवहारमा उतार्न आग्रह गरे । जिल्ला समन्वय अधिकारी नवराज बरालले क्षमता निरन्तर बढाउन जरूरी रहेको भन्दै समृद्ध कास्कीका लागि प्रभावकारी जनप्रतिनिधिहरू निर्माणमा तालिम फलदायी भएको दाबी गरे ।

जिल्ला समन्वय समिति कास्कीले मंगलबार कास्कीका ४ वटा गाउँपालिका र बुधबार पोखरा महानगर अन्तर्गतका वडा सदस्यहरू सहभागी भएको क्षमता विकास तालिम आयोजना गरेको थियो । कार्यक्रममा विकासका योजना छनोट, प्रक्रिया र विधि स्थानीय सरकार सञ्चालनमा वडा सदस्यको भूमिका, विद्यमान ऐन कानुन लगायत विषयमा प्रशिक्षण प्रदान गरिएको कार्यालयका सूचना अधिकारी झविश्वर रेग्मीले उल्लेख गरे ।

कार्यक्रममा गण्डकी प्रदेश प्रशिक्षण प्रतिष्ठानका कार्यकारी निर्देशक ऋषिराम पाण्डे, जिल्ला समन्वय अधिकारी नवराज बराल, शाखा अधिकृत झविश्वर रेग्मी लगायतले सहजीकरण गरेका थिए । जिसस कास्कीका प्रमुख लीलाधर पौडेलको अध्यक्षतामा सम्पन्न कार्यक्रममा स्वागत उप–प्रमुख सरिता माल र सञ्चालन जिल्ला समन्वय अधिकारी नवराज बरालले गरेको सो कार्यालयले जानकारी दिएको छ ।