पोखरा ।
खेमलाल हरिकला लामिछाने समाज कल्याण प्रतिष्ठानले पद्मश्री साधना सम्मान बिसको दशकदेखि चित्रकला र कार्टुनकलाका क्षेत्रमा महत्त्वपूर्ण योगदान दिने कलाकार दुर्गा बराल (वात्स्यायन) लाई अर्पण गर्ने निर्णय गरेको छ ।

नेपाली कार्टुनलाई नयाँ शैली तथा कलात्मक र धारिलो व्यङ्ग्यका माध्यमबाट नवीन दिशा दिने काम गरेकोले नेपाली चित्रकलामा वात्स्यायनको पुर्याएको योगदान विशिष्ट रहेकाले यो सम्मान उनलाई प्रदान गरिएको बताइएको छ ।

मनु उपन्यासका लेखक देवीप्रसाद सुवेदीलाई पद्मश्री पुरस्कार प्रदान गर्ने निर्णय प्रतिष्ठानले गरेको छ ।

त्यस्तै, यस वर्षको पद्मश्री गौरव पुरस्कार शिक्षा क्षेत्रमा विशेष योगदान दिने शिक्षाविद् तथा काठमाडौँ विश्वविद्यालयका संस्थापक उपकुलपति सुरेशराज शर्मालाई दिइने भएको छ । यो गत वर्षबाट प्रदान गर्न थालिएको पुरस्कार हो।

पद्मश्री साहित्य पुरस्कार, पद्मश्री साधना सम्मान र पद्मश्री गौरव पुरस्कार तीन वटैको रााशि तीन लाख रहेको छ । सम्मान तथा पुरस्कार कोजाग्रत पूर्णिमाका दिन एक कार्यक्रमको आयोजना गरी प्रदान गरिने छ ।