पोखराको मुस्ताङ चोकबाट बुधबार दिउँसो पक्राउ परेका विप्लव नेतृत्वको नेपाल कम्युनिस्ट पार्टी समर्थित कार्यकर्ता । उच्च अदालत पोखराबाट निस्के लगत्तै उनीहरुलाई राज्य विरुद्धको अपराधमा जिल्ला अदालत तनहुँको पक्राउ पुर्जी देखाएर पक्राउ गरिएको हो ।

समाधान संवाददाता, पोखरा

उच्च अदालत पोखराको आदेशपछि रिहा भएका विप्लव नेतृत्वको नेपाल कम्युनिस्ट पार्टी समर्थित ९ मध्ये ४ जनालाई प्रहरीले बुधबार मुस्ताङचोकबाट पक्राउ गरेको छ । मंगलबार आदेश आए पनि पुन पक्राउ परिने डरले भित्रै बसेका ९ मध्ये ४ जनालाई अदालतबाट निस्के लगत्तै जिल्ला अदालत तनहुँको पक्राउ पुर्जी देखाएर पक्राउ गरिएको हो । पक्राउ पर्नेमा जंगबहादुर भण्डारी, सन्तोष विक, काजी गुरुङ र मीलन राई छन् ।

उच्च अदालत बार एसोसिएसन पोखरा अध्यक्ष रोहितराज बास्तोलाको गाडीमा बसेर निस्केका उनीहरुलाई दिउँसो मुस्ताङचोकबाट पुन नियन्त्रणमा लिइएको हो । बाँकी ५ जना मानवअधिकार कर्मीको साथ लागेर पृथ्वीनारायण क्याम्पसको होस्टेल पुगेका छन् । अदालत बाहिर प्रहरी तैनाथ भइहरेकाले पुन पक्राउ पर्ने डरले गगन परियार, आस्था नेपाली, प्रकाश बास्तोला, सुजन सापकोटा र राजन साउद कानुन व्यवसायी र मानवअधिकारकर्मीको साथ लागेर क्याम्पस पुगेका हुन् ।

उनीहरुलाई मंगलबार मुख्य न्यायाधीश यज्ञप्रसाद बस्याल र न्यायाधीश डालकुमार खड्काको इजलाशले रिहा गर्न आदेश दिएको थियो । आदेश लगत्तै अदालतका रजिस्ट्रार जीतेन्द्रबाबु थपलियाले उच्च बार अध्यक्ष रोहितराज बास्तोला, मानवअधिकार आयोगका अधिकृतद्वय ज्योतिप्रसाद घिमिरे र टंकप्रसाद खनालको रोहबरमा ९ जना रिहा भएको कागज गरिदिएका थिए । तर अदालतको ढोकैमा प्रहरीको गाडी देखेपछि उनीहरु राति अदालतकै बरण्डामा रात बिताएका हुन् ।

यी ९ जनालाई अदालतले जेठ ३० गते पनि बन्दी प्रत्यक्षीकरण रिटमा सुनुवाई गर्दै रिहा गर्न आदेश दिएको थियो । आदेश भएकै राति उनीहरुलाई प्रहरीले अदालत परिसरमा छिरेर बार एसोसिएसनको ढोका फोरेर गिरफ्तार गरेको थियो ।

बैठकको क्रममा जेठ २५ गते प्रहरीले कास्कीको घान्द्रुकबाट १८ जनालाई पक्राउ गरेको थियो । तीमध्ये ८ जना यसअघि नै छुटिसकेका छन् भने १ जनालाई पुन पक्राउ गरी पर्वत पठाइएको छ ।

थप २ पक्राउ
विप्लव नेतृत्वको नेपाल कम्युनिस्ट पाटीमा संलग्न रहेको आरोपमा बुधबार कास्की प्रहरीले थप २ जनालाई पक्राउ गरेको छ । पक्राउ पर्नेमा सञ्जीव कार्की र राजकुमार घिमिरे छन् । घिमिरे रेका इमान्दार मिडिया डट कमका पोखरा समाचारदाता हुन् ।