पोखरा ।

कामना सेवा विकास बैंकको वार्षिकोत्सवको अवसरमा आयोजित तेस्रो अन्तर बैंक तथा वित्तीय संस्था स्तरिय फुटसल कप प्रतियोगिता २०८० को उपाधि गरिमा विकास बैंकले जितेको छ ।

पुरुष तर्फको खेलको फाइनल खेलमा गरिमाले माछापुच्छ्रे बैंकलाई २–१ ले हराउँदै उपाधि जितेको हो । गरिमाले सेमिफाइनल खेलमा प्रभु बैंक लिमिटेडलाई पेनाल्टी सुट आउटमा ३–१ र फाइनल खेलमा बलियो प्रतिद्वन्द्वी माछापुच्छ्रेलाई २–१ गोल अन्तरले पराजित गरेको हो ।

प्रतियोगितामा पुरुषतर्फ १२ वटा बैंक तथा वित्तीय संस्थाको सहभागिता थियो । विजेता तथा उपविजेता टिमलाई कामना सेवा बैंकको तर्फबाट ट्रफी, मेडल, प्रमाण पत्र पुरस्कार प्रदान गरिएको थियो । प्रतियोगिताभर उत्कृष्ट प्रर्दशन गरेको गरिमाका खेलाडी सौगातदीप सिंह उत्कृष्ट गोलकिपर र विशाल बानिँया उत्कृष्ट खेलाडी घोषित भए ।