जोमसोम ।
मुस्ताङको थासाङ २ कोवाङमा शुक्रबारदेखि जिल्ला स्तरीय नवौं राष्ट्रपति रनिङ सिल्ड प्रतियोगिता सुरु भएको छ । जिल्ला खेलकुद विकास समिति मुस्ताङको आयोजना तथा जनआदर्श अमरसिंह माध्यमिक विद्यालयको समन्वयमा प्रतियोगिता भएको हो ।

‘स्वास्थ्यका लागि खेलकुद, राष्ट्रका लागि खेलकुद’ भन्ने उद्घोषसहित भएको प्रतियोगिताको संघीय प्रतिनिधि सभा सदस्य योगेश गौचन थकालीले उद्घाटन गरे । सांसद थकालीले मुस्ताङमा खेलकुद पर्यटनको उच्च सम्भावना भएको जनाए । थाक खेलकुद तथा सांस्कृतिक विकास संघका अध्यक्ष कृष्णकुमार शेरचन, जिल्ला खेलकुद विकास समितिका अध्यक्ष अजित थकाली र ज्ञानोदय माध्यमिक विद्यालयका प्रधानाध्यापक अनन्तराज आर्चाय लगायतले कार्यक्रममा बोलेका थिए ।

प्रतियोगितामा २ स्थानीय तहका ६ विद्यालयको सहभागिता छ । जसमा थासाङ गाउँपालिकाबाट ज्ञानोदय माध्यामिक विद्यालय (लेत), जनआदर्श अमरसिंह माध्यमिक विद्यालय (कोवाङ), योगेन्द्र माध्यामिक विद्यालय (टुकुचे) र नालान्दा बुद्धिस स्कुल (टुकुचे)ले प्रतियोगितामा सहभागिता जनाएका छन् । घरपझोङ गाउँपालिकाबाट जनवाल माध्यमिक विद्यालय (मार्फा) र जनहित माध्यमिक विद्यालय(जोमसोम)ले भाग लिएका छन् ।

प्रतियोगिता अन्तर्गत छात्र/छात्रा भलिबल, सय, दुई सय, चार सय, आठ सय र पन्ध्र सय मिटर दौड (छात्र/छात्रा) र दुई सय, चार सय र आठ सय मिटर (छात्र/छात्रा) रिले दौड प्रतियोगिता समावेश गरिएको जिल्ला खेलकुद विकास समितिका सचिव सुमन थकालीले जानकारी दिए ।

हाइजम्प (छात्रा/छात्रा), लङजम्प (छात्रा/छात्रा), सट्पुट (छात्र/छात्रा), कबड्डी (छात्र/छात्रा) र भाला (ज्याभलिङ थ्रो) छात्र÷छात्रा खेलसमेत हुने छन् । प्रतियोगिताको पहिलो दिन शुक्रबार छात्र/छात्रा तर्फको भलिबलका समूह चरणका खेल सकिएका छन् । यस्तै, १५ सय मिटर छात्र/छात्रा दौड प्रतियोगिता पनि भएको छ ।

उपल्लो मुस्ताङको दिव्यदीप माध्यामिक विद्यालय छोसेर चिसोका कारण घुम्ती कक्षा सञ्चालन गर्न पोखरा झरेको र कागबेनीको जनशान्ति माध्यमिक विद्यालय गत श्रावण २८ गतेको बाढीले विद्यालय बन्द भएकाले सहभागी भएनन् ।