पोखरा ।
७५ औँ अन्तर्राष्ट्रिय मानव अधिकार दिवस १० डिसेम्बरका अवसरमा सबैका लागि मर्यादा, समानता र न्याय भन्ने मूल नाराका साथ कास्कीमा प्रभातफेरी गरिएको छ ।

गण्डकी प्रदेश सरकार, राष्ट्रिय मानव अधिकार आयोग, मानवअधिकार महाभेला गण्डकी प्रदेशको सयुक्त आयोजनामा उक्त कार्यक्रम आयोजना गरिएको थियो । कार्यक्रम पोखराको मानव अधिकार चोक चिप्लेढुंगाबाट सुरु भएको प्रभातफेरीसभागृह पुगेर सभामा परिणत भएको थियो ।

सभामा बोल्दै गण्डकी प्रदेश सरकारकी मुख्यसचिव लक्ष्मीकुमारी बस्नेतले गण्डकी प्रदेश सरकार मानव अधिकारको संरक्षण र प्रवद्र्धन गर्नको लागि प्रतिवद्ध रहेको जनाइन् । उनले अहिले पछिल्लो समय मुलुकभरि नै महिला र बालबालिका माथि हुने हिंसाका घटनामा वृद्धि भइरहेको पनि सुनाइन् ।

राष्ट्रिय मानव अधिकार आयोग गण्डकी प्रदेशका निमित्त प्रमुख खिमलाल सुवेदीले राष्ट्रिय मानवअधिकार आयोगले समग्र मानवअधिकारको अवस्थाको अनुगमन गरिरहेको जानकारी गराए । मानव अधिकार महाभेला गण्डकी प्रदेशका संयोजक बिना सिलवालले कार्यmक्रमको उद्देश्यमाथि प्रकाश पार्दै मानवअधिकारको संरक्षणमा राज्य जिम्मेवार बन्नुपर्नेमा आम नागरिकले त्यस्तो अनुभूति गर्न नपाएको गुनासो व्यक्त गरिन् ।

कार्यक्रममा गैसस महासंघ गण्डकी प्रदेशका अध्यक्ष गोपाल खड्काले मानव अधिकारको विषय सबैको साझा विषय भएकाले मानवअधिकारको संरक्षणका लागि सामाजिक संघसंस्थाहरु सरकारसँग समन्वय र सहकार्यमा काम गर्न सधै तयार रहेको बताए । राष्ट्रिय अपांगता महासंघ गण्डकीका अध्यक्ष खोमराज शर्माले अपांगता भएका क्षेत्रलाई राज्यले जति सम्बोधन गर्नुपर्ने हो सो अनुसार नगरेको बताए ।

पत्रकार महासंघ कास्कीकी अध्यक्ष विमला भण्डारीले पत्रकारिताले सधैं मानव अधिकारको रक्षाका लागि काम गर्ने गरेको सुनाइन् । कार्यक्रममा इन्सेक गण्डकी प्रदेशका संयोजक शिवप्रसाद खकुरेलले इन्सेकले गरेको अनुगमनले गण्डकी प्रदेशमा महिला र बालबालिका माथि हुने हिंसाका घटना वृद्धि भएको जानकारी गराए ।