लेखनाथ ।
पोखरा २९ ले भण्डारढिक खेलमैदानमा आयोजना गरिएको वडा स्तरीय खेलकुद कप २०८० को उपाधि गणेश टोल विकास सस्था पंट्नेरीले हात पारेको छ । शनिबार भण्डारढीक टोल विकास संस्था र गणेश टोल विकास संस्थाबिच भएको फाइनल निर्धारित समयमा बराबरी भयो ।

पेनाल्टी सुटका आधारमा भएको खेलमा ४–३ ले गणेश टोलले उपाधि जितेको हो । १७ वर्षभन्दा तलका युवालाई खेलतर्फ आर्कषण गर्नका लागि वडा नं २९ ले राखेको टोलस्तरीय फुटबल प्रतियोगितामा विजयी समूहलाई वडा नं २९ का वडाअध्यक्ष श्रीप्रसाद गुरुङले सिल्ड, मेडल र प्रमाण पत्र प्रदान गरे ।

उनले स्थानिय स्तरमा खेलाडी उत्पादनका लागि यो प्रतियोगिता फलदायी हुने विश्वास व्यक्त गरे । प्रतियोगितामा सिद्ध टोल विकास तेस्रो र ओख्ले टोल सान्त्वना भएका छन् । विजेता हुने टिमले नगद ३० हजार, उपविजेताले नगद २० हजार, तृतीयले १५ हजार र सान्त्वना हुने टिमले नगद १० हजारसहित शिल्ड, मेडल र प्रमाणपत्र प्राप्त गरेका छन् ।

सहभागी सबै टिमलाई नगद ५ हजार प्रदान गरिएको छ । प्रतियोगितामा उत्कृष्ट खेलाडीतर्फ कुशल लिम्बु, उत्कृष्ट गोलरक्षकमा साजन सुनार, उत्कृष्ट गोलकर्तामा उमेश चौधरी, स्ट्राइकर सुर्दशन खत्री र डिफेन्डरमा अर्विन परियार पुरस्कृत भएको खेल संयोजक कालिदास पोखरेलले जानकारी दिए ।