काठमाडौं ।
आउँदो माघमा हुने राष्ट्रिय सभा निर्वाचनका लागि २ हजार ४७ मतदाता कायम गरिएको छ । निर्वाचन आयोगले बुधबार राष्ट्रिय सभा निर्वाचनका लागि मतदाता नामावली स्वीकृत गरेको छ । २ हजार ४७ मतदाता कायम गरिएको आयोगका प्रवक्ता शालिग्राम शर्मा पौडेलले बताए ।

राष्ट्रिय सभाका २० जनाको ६ वर्षे कार्यकाल समाप्त हुन लागेको हुँदा आयोगले निर्वाचन तयारी गरेको हो । राष्ट्रिय सभाका एक तिहाइ सांसदको कार्यकाल हरेक २ वर्षमा समाप्त हुन्छ । सांसदको कार्यकाल ६ वर्ष हुन्छ ।

राष्ट्रिय सभा निर्वाचनमा प्रदेश सभा सदस्य, गाउँपालिकाका अध्यक्ष र उपाध्यक्ष तथा नगरपालिकाका मेयर र उपमेयर मतदाता हुने व्यवस्था छ । मृत्यु भएका जनप्रतिनिधिको नाम हटाएर मतदाता नामावली तय गरिएको पौडेलले बताए । सात प्रदेशमा कुल प्रदेश सभा सदस्य ५५० जना छन् । यसमध्ये मृत्यु भएका १ जनाको नाम हटाएर ५४९ कायम गरिएको हो ।

गाउँपालिका अध्यक्ष र उपाध्यक्ष तथा नगरपालिका मेयर र उपमेयर गरी १ हजार ५०६ जना हुन्छन् । यसमध्ये गाउँपालिका अध्यक्ष, उपाध्यक्ष र नगरपालिका उपमेयर गरी तीन जनाको मृत्यु भएको छ । गाउँपालिकाका एक जना अध्यक्ष र नगरपालिकाका ४ जना मेयर निलम्बनमा परेका छन् । उनीहरूको नाम हटाएर एक हजार ४९८ जनाको मतदाता नामावली कायम गरिएको आयोगले जनाएको छ ।

राष्ट्रिय सभा सदस्यका लागि आगामी माघ ११ गते निर्वाचन हुँदै छ । त्यसमा प्रदेश सभा सदस्यको मतभार ५३ हुन्छ भने गाउँपालिका अध्यक्ष र उपाध्यक्ष तथा नगरपालिका मेयर र उपमेयरको मतभार १८ हुन्छ । कुल ५७ हजार ५५९ मतभार छ ।