लेखनाथ ।
पोखरा महानगरपालिका वडा नम्बर २६ मा रहेको सेभेनलेक कृषि सहकारी संस्थालाई कृषि उत्पादनतर्फ अग्रसर हुन सुल्झाएको छ ।

सस्थाको नवौं वार्षिक साधारण सभामा बोल्ने वक्ताहरुले सहकारीको पछाडि कृषि जोड्ने तर कृषिका कार्यक्रममार्फत कसरी सेयर सदस्यको जीवनस्तर उकास्न सकिन्छ भन्नेबारेमा सहकारीले नीतिगत रुपमा नै कार्ययोजना ल्याउनुपर्नेमा जोड दिएका हुन् ।

सेयर सदस्यहरुले अबको सम्भावना भनेकै कृषि भएकाले युवाहरुलाई स्वदेशमा नै केही गर्ने वातावरण सृजना गर्नका लागि ठाउँ विशेष र सम्भावनालाई हेरेर सहकारीले पशुपालन, तरकारी वा माछापालन कुनलाई प्रथामिकता दिने हो सोही अनुरुप योजना बनाएर अगाडि बढ्नुपर्ने सुझाव राखेका थिए ।

कार्यक्रमको उद्घाटन गर्दै पोखरा महानगरपालिका सहकारी विभागका प्रमुख रविरमण तिवारीले अबका दिनमा सहकारीहरुले आफूलाई बचाई राख्न पनि एक सहकारी एक उत्पादन अनिवार्य भएको धारणा राखे । ‘सहकारीले पैसा बेचेर आम्दानी गर्नुभन्दा पनि सेवा र वस्तु बेचेर सेयर सदस्यहरुलाई आय आम्दानीमा जोड्नुपर्छ,’ उनले भने ।

सोही अवसरमा पोखरा महानगरपालिका वडा नं २६ का वडासदस्य सुदीपराज ढुंगाना, वडा नम्बर २९ का वडासदस्य कालिदास पोखरेल, संस्थाका कोषाध्यक्ष कृष्णप्रसाद अधिकारी, लेखा समितिका संयोजक राजु अधिकारी र सल्लाहकार टीकाराम पंगेनी लगायतले सहकारीले आगामी दिनमा कृषिलाई टेकेर नीति तथा कार्यक्रम बनाउनुपर्नेमा जोड दिएका थिए ।

संस्थाका उपाध्यक्ष कुशराज तिमिल्सेनाको अध्यक्षतामा भएको कार्यक्रमको सञ्चालन सचिव सुविन तिमिल्सेनाले गरेका थिए । स्वागत मन्तव्य शिक्षा उपसमितिका संयोजक विश्वनाथ ढुंगानाले गरेका थिए ।