पोखरा ।
पोखरामा युवायुवतीलाई धिमेबाजा र धिमे नाच तालिम दिइएको छ । नेवा मिसा पुच कास्कीको आयोजना र पोखरा महानगरपालिका वडा नं ३ को सहयोगमा भएको तालिममा ४० जना सहभागी थिए ।

१५ दिनसम्म चलेको तालिममा बिकेस महर्जन र लिजा महर्जनले प्रशिक्षण दिएका थिए । तालिम समापन कार्यक्रममा पोखरा ३ का वडाध्यक्ष प्रकाशमान उदासले संस्कार र संस्कृति जोगाईराख्न सकेमात्र पहिचान कायम रहने बताए ।

उनले पोखरामा भएका नेवा खलः, नेवा ल्याम्ह पुचः, नेवा पत्रकार तथा मिसा पुचहरुको सहयोगमा नेवारी समुदायको संस्कृति झल्किने संग्रहालय निर्माण भएकोमा खुसी व्यक्त गरे । नेवा खलः कास्की अध्यक्ष अशोक पालिखे पोखरामा नेवा संस्कार र संस्कृति प्रवर्धन र संरक्षणका लागि युवालाई पोखरामै पहिलो पटक धिमे नाचको तालिम दिइएको बताए । नेवा मिसा पुचः कास्कीले लोपोन्मुख अवस्थामा पुगेको पञ्चबुद्ध नाच, कुमारी नाच, चर्या नृत्य तथा धिमे नाचलाई पोखरामा पुनर्जागृत गरेको उनको भनाइ छ ।

नेवा मिसा पुचः कास्कीका अध्यक्ष संगीता बज्राचार्यले प्रशिक्षार्थिलाई निरन्तर अभ्यासमा लागिरहन आग्रह गरिन् ।