पोखरा ।
पोखरा महानगरपालिका वडा नम्बर १७ को कार्यालयले वडाका गर्भवती महिलालाई पोषण प्याकेज वितरण गर्दै आएको छ । अहिलेसम्म १ सय २३ जनाले वडाको उपहारका रुपमा पोषण प्याकेज पाएका छन् ।

पोखरा १७ मा रहेको सहरी स्वास्थ्य केन्द्रमा नियमित चेकजाँच गराउने गर्भवतीलाई आव ०८०/०८१ को वार्षिक योजनाबाट प्याकेज वितरण गरिएको वडाध्यक्ष राधिकाकुमारी शाहीले बताइन् । प्याकेजमा अन्डा, हर्लिक्स, क्वाटी लगायतका सामग्री राखिएको छ ।

‘बाल मृत्युदर र मातृ मृत्युदर घटाउँदै स्वस्थ नागरिक तयार गर्न सानै भए पनि प्रयास थालेका हौं,’ वडाध्यक्ष शाही भन्छिन्, ‘आमा र बच्चा कुपोषणको शिकार हुनु नपरोस् भनी सबैभन्दा नजिकको सरकारको तर्फबाट नागरिकलाई उपहार दिएका हौँ ।’
महानगरको धेरै जनसंख्या र ठूलो क्षेत्रफल भएका वडामध्ये पर्ने पोखरा १७ लाई योजनावद्ध रुपमा विकास गर्न आफूहरु लागिपरेको उनको भनाइ छ ।