पोखरा ।
पोखरा महानगरपालिका १९ लामाचौरले बाँदर नियन्त्रणका लागि रुख कटान गर्ने अभियान चलाएको छ । लामाचौर पुरुनचौर क्षेत्र बाँदरबाट अति प्रभावित भएको भन्दै वडाध्यक्ष पुष्पेन्द्र पाण्डेले ‘मेरो रुख म काट्छु’ भन्ने अभियान संचालन गरेका हुन् ।

गण्डकी सरकारले चालु आर्थिक बर्ष २०८०/०८१ को नीति तथा कार्यक्रममा समेत बाँदर नियन्त्रण सम्बन्धि नीति पास गरेकाले घर वरपर रहेका रुखहरु कटान गरि अभियानले सरकारलाई सहयोग पुग्ने पाण्डेको तर्क छ ।

रुख विरुवा बढि भएकै कारण बाँदरबाट कृषकले दुख पाएका र बाँदरबाट बालि जाेगाउन रुख काट्नुपर्ने उनकाे भनाइ छ ।

‘आजको मितिले १० दिनभित्र मेरो रुख म काट्छु भन्ने अभियान संचालन गरी आफ्नो घर वरपर रहेका सम्पूर्ण रुखहरू कटान गरी प्रदेश सरकारको नीति तथा कार्यक्रमलाई सहयोग पुर्‍याउनको साथै आफ्नो घर क्षेत्रमा बाँदर नियन्त्रण अभियानमा सहयोग पुर्‍याउन वडाबासीलाई अनुरोध छ ।’ उनले भने ।