पोखरा ।
पोखराको सहारा क्लबले स्थापना गरेको फुटबल एकेडेमीको सहयोगार्थ सहारा अक्षयकोषमा रकम संकलन हुने क्रम जारी छ । पोखरामा जारी २३ औं आहा रारा पोखरा गोल्ड कपको अवसरमा नेपालका पूर्व राष्ट्रिय फुटबल खेलाडी, भारतीय एक्स आर्मी इन्टर सर्भिसमा समेत आबद्ध पोखरा १५ लक्ष्मीटोल निवासी हाल बेलायत बस्ने रुपक गुरुङ र समाजसेवी नन्दा गुरुङले अक्षयकोषमा १ लाख ११ हजार १ सय ११ रुपैयाँ सहयोग गरेका छन् ।

रुपक तथा नन्दा गुरुङले उक्त रकम बराबरको चेक क्लबका अध्यक्ष केशवराज बराललाई हस्तान्तरण गरेको महासचिव रामजी प्रसाद अधिकारीले बताए । क्लबले सञ्चालन गरेको सहारा एकेडेमीका बालकहरुको भरणपोषणमा थप टेवा पुग्ने विश्वासका साथ उक्त सहयोग गरेको पूर्व खेलाडी रुपकले बताए ।

दाताले दिएको उक्त रकम उचित ढंगले एकेडेमीका बालकहरुको शिक्षा, दिक्षा तथा फुटबल खेलको लागि खर्च गरिने भएको सहारा क्लबका अध्यक्ष केशवराज बरालले सुनाए । पोखरा १७ दोबिल्लामा रहेको सहारा एकेडेमीमा ८ जिल्लाका १४ जना बालक छन् ।