सञ्जय रानाभाट, पोखरा ।
गण्डकी प्रदेश सभाले बर्खे अधिवेशनका लागि सांसदहरुलाई पर्खिरहेको छ । तर, पनि सरकारले नजिकै बैठक डाक्ने कुनै छनक देखाएको छैन । तथापि बर्खे अधिवेशन कुरेर बसेका सांसदको स्वागतमा प्रदेशसभा सचिवालयले भवनलाई सजावट तथा व्यवस्थित पार्ने काम गरिरहेको छ । प्रदेश सभामा भवनमा अहिले धमाधम भित्री/बाहिरी व्यवस्थापनको काम भइरहेको छ । अघिल्लो सांसदहरूले प्रयोग गरेका माइकहरू हटाएर नयाँ नयाँ माइकहरू राखिएका छन् ।

सांसदहरूलाई नयाँ माइक मात्रै होइन उनीहरूका लागि नयाँ टेबल र कुर्ची (सोफा) पनि पनि राखिएको छ । सचिवालयका झनकराज अधिकारीले प्रदेश सभा बैठकलाई थप व्यवस्थित गर्ने काम अन्तिम चरणमा पुगेको बताए । उनले बजेट अभावका कारणले सभामुखको पोडियमलाई भने नयाँ लुक्स दिन नसेकेको सुनाए । ‘बजेट अभावले अहिले सभामुखज्यूको कक्षलाई चेन्ज गर्न सकिएको छैन । सरकारसँग बजेट माग गरेर फेर्ने हाम्रो प्रयास भने जारी छ,’ उनले भने । गण्डकी प्रदेशसभा बाहिर चिटिक्क देखिए पनि भित्री आवरण कमजोर छ ।

०७४ सालदेखि प्रदेश संरचना खडा भएलगतै तत्कालीन नगर प्रशिक्षण केन्द्रको भवनलाई प्रयोगमा ल्याउँदै प्रदेश सरकारले प्रदेश सभा स्थापना गरेको थियो । यसका लागि सरकारले प्रत्येक वर्ष सिँगार्न बजेट खर्च गर्दै आएको छ । प्रदेश सभा भवन स्थापना गर्दै राखिएको ती टेबल कुर्चीले नै अहिले विस्थापन गरेर नयाँ हालिएको हो । यसका लागि प्रदेश सरकारले नै चालु आर्थिक वर्षका लागि बजेट विनियोजन गरेको थियो ।

टेबल र कुर्ची फेर्न शीर्षकमा सरकारले १५ लाख रुपैयाँ र माइकल साउन्ड सिस्टम फर्न १० लाख रुपैयाँ विनियोजन गरेको छ । सोही रकमलाई सचिवालयले खर्च गरे प्रदेश सभाका नयाँ लुक्स दिएको अधिकारीले बताए । ‘कुर्ची र टेबल फेर्न बजेट १५ लाख हो । त्यो शीर्षकमा छुटिएको रकमबाट नयाँ सोफा ६३ वटा र टेबल २९ वटा नयाँ थपिएको छ,’ अधिकारीले भने । प्रति सोफाका करिब १३ हजार रुपैयाँ पर्न गएको अधिकारीले बताए ।

उनका अनुसार २९ वटा टेलबको प्रति गोटा साढे ७ हजार बजेट खर्च भएको छ । ‘बिलिङ गर्ने समय भएको छ । कुल कति खर्च हुन्छ, हिसाब नै गर्नुपर्छ । तर, हाम्रो स्टिमेट साढे १४ लाखमा सक्ने हो,’ अधिकारीले भने ।

सभालाई मर्यादित बनाउन ‘नयाँ माइक’
प्रदेश सभा बैठकलाई मर्यादित बनाउन नयाँ माइक जडान गरिएको छ । एउटा टेबलको माइक दुईजना सांसदले सेयरिङ गर्ने गरी नयाँ माइक जडान गरिएको हो । जुन माइकले सभामुखलाई रुलिङ गर्न सजिलो हुने प्रदेश सभाका प्रवक्ता प्रेम सुवेदीले बताए । उनका अनुसार विगतका माइकमा सभामुखले दिएको माइकभन्दा बढी बोल्दा रोख्नुस् भन्नुपर्ने थियो तर, अहिले सभामुखले दिएको टाइम सकिएपछि सचिवालयले आफैं माइक काट्नेछ ।

ती माइक र २ साउन्ड (मिक्चर) गरेर करिब ९ लाख रुपैयाँ खर्च भएको अधिकारीले बताए । माइकका पनि बिलिङ अन्तिम चरणमा पुगेको उनले सुनाए । माइक भने ३० वटाभन्दा कम भएको उनको भनाइ छ ।

सरकारले माइक सिस्टमका लागि पनि १० लाख रुपैयाँ बजेट विनियोजन गरेको थियो । जुन अझै अपर्याप्त भएको सचिवालयका अधिकारी बताउँछन् । उनले अहिले आधारभूत र अत्यावश्यक काम मात्र भइरहेको बताए । प्रदेश सभामा हिँड्ने स्ल्याब पनि निर्माण अन्तिम चरणमा पुगेको बताए । भवन मर्मत शीर्षकमा भने छुट्टै रकम छुटिएको उनको भनाइ थियो ।

अधिवेशन आह्वानको पखाईमा सांसद
गण्डकी प्रदेश सभाको हालसम्म दुई नियमित र दुई विशेष गरी ४ अधिवेशन सम्पन्न भएका छन् । हिउँदे अधिवेशन गत असोज ११ गते अन्त्य भएको थियो । अर्को बजेट अधिवेशन डाक्ने भन्ने सरकारको कुनै तयारी देखिँदैन ।

ऊर्जा, जलस्रोत तथा खानेपानी मन्त्री एवं सरकारकी प्रवक्ता सरस्वती अर्याल तिवारीले ३/४ दिनपछि बस्ने मन्त्रिपरिषद् बैठकले अधिवेशनको निक्र्यौल गर्ने बताइन् । उनले अघिल्लो बैठक केन्द्रको भन्दा ढिला स्थगित भएपनि अब सरकारले छिट्टै अधिवेशन आह्वन गर्ने बताइन् । ‘अब हामी पनि बोलाउँछौं,’ उनले भनिन् ।

यद्यपि सरकारले बैठक ढाक्ने कुनै तयारी भने देखिँदैन । प्रदेश सचिवालयमा हालसम्म कुनै पनि विधेयक दर्ता नभएको प्रदेश सभाका प्रवक्ता प्रेम सुवेदीले बताए । सांसदहरु भने सरकारले बिजनेश दिन नसक्दा बैठक डाक्न ढिला भएको बताउँछन् । भन्छन्, ‘जनताका मागहरुलाई छिट्टो भन्दा छिट्टो सम्बोधन गर्नुपर्ने छ । सरकारले बैठक कहिले समय सीमा पुग्छ भनेर मिति कुरेर बसिरहेको छ,’ एक सांसदले भने ।

दोस्रो कार्यकालको यो समयमा प्रदेशमा सात विधेयक र एक नियमावली पारित भएका छ । संसदीय समितिबाट पनि बिउबिजन सम्बन्धी विधेयक पारित भएको सभापति फणीन्द्र देवकोटाले बताए । सभाको पहिलो अधिवेशनले चार र चौथो अधिवेशनले तीन विधेयकसँगै प्रदेश सभा सञ्चालनका लागि तयार गरिएको प्रदेश सभा नियमावली, २०८० समेत पारित गरिसेको छ ।