लेखनाथ ।
गण्डकी मिजार समाज पोखरा २६ को अध्यक्षमा तेजबहादुर नेपाली चयन भएका छन् । संस्थाको शनिबार भएको छैंटौं वार्षिक साधारणसभा तथा तेस्रो अधिवेशनले नेपालीको अध्यक्षमा सर्वसम्मत समिति चुनेको हो ।

उपाध्यक्षद्वयमा मनबहादुर चर्मकार र कुलबहादुर नेपाली, सचिव मिस्टर नेपाली, सहसचिव मीनबहादुर नेपाली, कोषाध्यक्ष सन्तोषी नेपाली र सह कोषाध्यक्षमा मंगल नेपाली छन् । सदस्यमा रमेशकुमार बोहोरा, मञ्जु बस्याल, पार्वती हरिजन सिके, हरि नेपाली, भीमबहादुर बोहोरा र भविराम बोहोरा छन् ।

सभामा पोखरा २६ का वडाध्यक्ष नरेन्द्र थापाले स्थापना कालदेखि हालसम्म समाजले विकृति, विसंगतिमा काम गर्दै आएका जनाए । संस्थाका सल्लाहकार बुद्धराज बस्यालले संस्थाको जग्गा खरिददेखि भवन निर्माणसम्म सहयोग, साथ दिनेहरुप्रति आभार प्रकट गरे ।

सल्लाहकार तेजबहादुर बस्यालले संस्था साझा परिवार भएको जनाए । अन्नपूर्ण मिजार समाजका अध्यक्ष चेतबहादुर नेपालीले गण्डकी मिजार समाजले रचनात्मक र सिर्जनशील कार्य गर्दै आएको उल्लेख गरे । संस्थापक अध्यक्ष पूर्णबहादुर नेपालीले आपसी एकता र सद्भावको माध्यमबाट संस्थालाई अघि बढाउन आग्रह गरे । संस्थाका अध्यक्ष गोपाल नेपालीको अध्यक्षतामा कार्यक्रम भएको थियो ।