पोखरा ।
नेपाल पुस्तक तथा स्टेसनरी व्यवसायी महासंघको केन्द्रीय अध्यक्षमा ऋषिराम शर्माले उम्मेदवारी घोषणा गरेका छन् । मनकामना बुक्स एन्ड स्टेशनर्स महेन्द्रपुल पोखरामा बिगत ३० वर्षदेखि पुस्तक तथा स्टेसनरीको खुद्रा व्यवसाय गर्दे आएका शर्मा नेपाल पुस्तक तथा स्टेसनरी व्यवसायी महासंघका पूर्वउपाध्यक्ष हुन् ।

यही फागुन १८ र १९ गते काठमाडौंमा आयोजना हुन लागेको महासंघको सातौं महाधिवेशनमा अध्यक्ष पदमा आफूले उम्मेदवारी दिने घोषणा गरेका शर्माले आफू निर्वाचित भएमा महासंघको भवन र सचिवालय स्थापना गर्ने, पुस्तक, मसलन्द तथा स्टेसनरीको राष्ट्रिय तथा अन्तर्राष्ट्रिय प्रदर्शनी गर्ने, पुस्तक प्रकाशक, उत्पादक, वितरक र खुद्रा व्यवसायीका बीचमा सौहार्दपूर्ण सम्बन्ध स्थापना गर्ने बताए ।

शर्मा स्थापना कालदेखि नै महासंघमा सक्रिय रहेर महासंघको विधान मस्यौदा समितिको विभिन्न पदमा बसेर सफल कार्य सम्पादन गरेका थिए । उनले पुस्तक तथा स्टेसनरी व्यवसायमा खुद्रा व्यवसाय गर्दै आएका व्यवसायीका अधिकारका लागि विशेष आवाज उठाउँदै आएका छन् ।

शर्मालाई नेपाल पुस्तक तथा स्टेसनरी व्यवसायी महासंघ गण्डकी प्रदेशले सर्वसम्मत महासंघको केन्द्रीय अध्यक्षका रुपमा साझा उम्मेदवारका रुपमा अगाडि सारेको छ ।