पोखरा ।

नेकपा एमाले कास्कीको आसन्न जिल्ला अधिवेशनकाे प्रतिनिधि छनोट कार्यक्रम स्थगित भएको छ । यही चैत १० र ११ गतेका लागि तोकिएको जिल्ला अधिवेशनमा सहभागी बन्नका लागि चैत ३ गते जिल्लाभरका लागि प्रतिनिधि छनोट गर्ने कार्यक्रम राखिएकाे छ ।

नेकपा एमालेको केन्द्रीय संगठन विभागले शुक्रबार दिउसो गण्डकी प्रदेश कमिटीलाई पत्र पठाई कास्की जिल्लाको पूर्व निर्धारित प्रतिनिधि छनोट प्रक्रिया स्थगित गर्न निर्देशन दिएकाे छ । संगठन विभाग प्रमुख काशीनाथ अधिकारीले हस्ताक्षर गरेर पठाएकाे पत्रमा प्रतिनिधि छनोट विधिका बारेमा संगठन विभागमा उजुरी परेको उल्लेख छ ।

नेकपा एमाले कास्कीका इन्जार्ज थममाया थापासहित कास्कीबाट केन्द्रीय कार्यसमितिमा प्रतिनिधित्व गर्ने केही केन्द्रीय सदस्य र जिल्ला कमिटीका केही पदाधिकारीले संगठन विभागमा उजुरी दिएका कारण प्रतिनिधि छनोट स्थगित गर्न निर्देशन दिनुपरेको संगठन विभाग प्रमुख अधिकारीले बताएका छन् ।

संगठन विभागले जिल्ला अधिवेशनमा सहभागी हुने प्रतिनिधि छनोट गर्ने विधि बारेको बुझाइमा बिल्कुलै एक रुपता नभएको भन्दै पुन जिल्ला कमिटीको बैठक बसेर एक रुपता कायम गरी प्रतिनिधि छनाैट गर्न भनिएको छ ।