मुस्ताङ ।
मुस्ताङमा एकै दिन लेक लागेर २ पर्यटकको मृत्यु भएको छ । मृत्यु हुनेमा एक भारतीय र एक नेपाली रहेको जिल्ला प्रहरी कार्यालय मुस्ताङले जनाएको छ ।

मोरङको पगरी शनिश्चरे नगरपालिका १ की ६५ वर्षीया गोमादेवी लुईटेलको लेक लागेर मृत्यु भएको जिल्ला प्रहरी कार्यालय मुस्ताङका डिएसपी भोजराज पाण्डेयले जानकारी दिए । मुक्तिनाथ दर्शनका लागि मनकामना बचत तथा ऋण सहकारी संस्थाका ७४ सदस्यसँगै उनी आएकी थिइन् ।

आइतबार जोमसोमबाट मुक्तिनाथ जाँदै गर्दा वारागुङ मुक्तिक्षेत्र १ खिङ्गामा गोमादवीलाई स्वास्थ्यमा समस्या देखिएको थियो । उनलाई स्वासप्रश्वासमा समस्या भएपछि केही बेरमा उनी बेहोस भएकी थिइन् । गोमादेवीलाई उपचारका लागि जोमसोमको मुस्ताङ जिल्ला अस्पतालमा पुर्‍याइएको थियो ।

उपचारका क्रममा चिकित्सकले गोमादेवीलाई मृत घोषणा गरेको डिएसपी पाण्डेयले उल्लेख गरे । प्रहरीले शव आफन्तलाई जिम्मा लगाएको छ ।

यसअघि आइतबार बिहान ३ बजे होटलमा बाँस बसेका एक भारतीयको उपचारका क्रममा मृत्यु भएको थियो । होटलमा बेहोस भएपछि मुस्ताङ जिल्ला अस्पताल लगिएका उनको मृत्यु भएको हो ।

भारतको हैदरावादबाट मुक्तिनाथ दर्शनका लागि ४१ भारतीय तीर्थालु मुुस्ताङ आएका थिए । अघिल्लो दिन मुक्तिनाथ दर्शन गरी फर्किएर जोमसोममा बाँस बसेका उनीहरुमध्ये ८३ वर्षीय बि नारायणलाई लेक लागेर स्वास्थ्यमा समस्या देखिएको थियो ।
उपचारका क्रममा चिकित्सकले उनलाई मृत घोषणा गरेका थिए । प्रहरीले घटनाको समेत विवरण संकलन गरी मुचुल्का उठाएर शव आफन्तको जिम्मा लगाएको छ ।

चालु आर्थिक वर्षमा मुक्तिनाथ दर्शन गर्न आउने क्रममा लेक लागेर मृत्यु हुनेको संख्या ७ जना पुगेको छ । अघिल्लो वर्ष १२ जनाको लेक लागेर मृत्यु भएको थियो । त्यसअघिको वर्ष ६ जना पर्यटकले लेक लागेर ज्यान गुमाएका थिए । समथर भूभागबाट हिमाली भेगमा आउँदा कतिपयलाई लेक लागेर बिरामी हुने समस्या देखिएको हो । उमेर कटेका वृद्धवृद्धा, शारीरिक रुपले अशक्त र दीर्घ रोगमा यस्तो समस्या बढी देखिने गरेको छ ।

निरन्तरको यात्रामा स्वास्थ्य परीक्षण नहुने र बिचमा बिश्रामसमेत नहुँदा पर्यटकलाई लेक लाग्ने समस्या देखिएको डिएसपी पाण्डेय बताउँछन् । । हिउँद यामको चिसो सकिएर गर्मी याम सुरु भए पनि मुस्ताङमा अझै चिसो रहेकाले लेक लाग्ने समस्या भएको उनले जनाए । कतिपय पर्यटकलाई मुक्तिनाथको कुण्डमा स्नान गर्दा चिसोले लेक लाग्ने गरेको छ ।