कृष्ण न्यौपाने
दमौली

तनहुँको बन्दीपुर गाउँपालिकामा निर्माण हुन लागेको केबलकारको बटम स्टेसन भवन निर्माण सुरु भएको छ । केबलकारको साझेदारी कम्पनी आरकेडी रियल स्टेट एन्ड कन्स्ट्रक्सन लिमिटेडका अध्यक्ष रामचन्द्र शर्माले उक्त भवनको सोमबार शिलान्यास गरेका हुन् ।

बन्दीपुर गाउँपालिका–४ ठूल्ढुंगामा बन्ने भवनको लागत १८ करोड ५५ लाख रुपैयाँ छ । भवन १५ महिनामा सम्पन्न गर्ने लक्ष्य राखिएको शर्माले जानकारी दिए । आरकेडी रियल स्टेट एन्ड कन्स्ट्रक्सन लिमिटेड, पञ्चासे केबलकार एन्ड टुर्स लिमिटेड, टुरिजम इन्भेस्टमेन्ट फन्ड, बन्दीपुर गाउँपालिकाको साझेदारीमा निर्माण हुन लागेको बन्दीपुर पर्यटन पूर्वाधारयुक्त परियोजनाको लागत १ अर्ब ३८ करोड छ ।

केवलकारको टप स्टेसनमा १० तलाको होटल सहितको भवन निर्माण गरिनेछ । ८२ करोडको लागतमा निर्माण हुने उक्त भवनमा आधुनिक भ्यु टावर, बेंक्युट हल र ८० कोठाका कोठाका स्तरीय होटल निर्माण गरिने शर्माले जानकारी दिए । शर्माका अनुसार रेस्ट्रो जोन, सपिङ मल र केबलकारको ड्राइभ स्टेसन, टिकट काउन्टर र उत्तर दक्षिण प्यासेजको निर्माण गर्ने री काम अगाडि बढाइएको छ । ५ सय क्षमताको सभाहल समेत उक्त भवनमा निर्माण गरिनेछ ।

‘पहाडकी रानी’ नामले परिचित बन्दीपुर घुम्न आउने पर्यटकलाई मनोरञ्जन र सुविधा प्रदान गर्ने उद्देश्यले कम्पनीले विविध पूर्वाधार निर्माणको योजना अनुसार कामलाई तीव्र पारेको छ ।

प्रारम्भमा ५६ करोडको लागतमा केवलकार सम्पन्न गर्ने योजना रहेकोमा कम्पनीले केवलकार प्रविधिलाई आधुनिक ‘मोनोकेबल डिटाचेबल प्यासेन्जर सिस्टम’ जडान गर्ने र सुरक्षाको पक्षलाई महत्व दिएर सुरक्षा उपकरणहरु जडान गर्ने योजना थप गरेको शर्माले जानकारी दिए ।

साहसिक पर्यटनको मज्जा दिन बन्दीपुरदेखि छिम्केश्वरी फेदीसम्म माउन्टेन जंगल सफारीको सेवा शुरु गर्ने गरी कम्पनीले लगानी गर्ने जनाएको छ । ‘परियोजनामा सबै क्षेत्रको लगानी सुनिश्चित गर्नका लागि निजी, सामुदायिक, सहकारी, सरकारी र संस्थागत साझेदारी एवं व्यवस्थापनको मोडेलमा पुँजी निर्माण गरिनेछ,’ उनले भने ।

यसलाई लागु गर्नको लागि कम्पनीलाई पब्लिक लिमिटेड कम्पनीको रुपमा लैजाने प्रक्रिया अन्तिम चरणमा पुगेको र सबै पक्षलाई वर्गीकरण गरेर साना लगानीकर्तालाई पर्यटन सहकारी बनाएर यस मार्फत् शेयर दिने कम्पनीले बताएको छ ।

ठूल्ढुंगास्वाँराबाट बरालथोकसम्म जोडिने केवलकारबाट घन्टामा २ सय जना वारपार गर्न सक्नेछन् । एसियाकै ठूलो दाबी गरिएको विमलनगरस्थित सिद्धगुफा र प्राकृतिक दृश्यावलोकनका लागि उपयुक्त बन्दीपुर घुम्न आउने पर्यटकका लागि आकर्षणको केन्द्रविन्दु बन्ने विश्वास लिइएको छ । ठूल्ढुंगास्वाँराबाट सुरू हुने केबलकार सिद्धगुफाको छेउ हुँदै बन्दीपुरको उचाइसम्म पुग्नेछ । केबलकारले १ किलोमिटर ६ सय मिटर यात्रा गर्नेछ ।

तनहुँको डुम्रे बजारदेखि बन्दीपुर पुग्न ७ किलोमिटरको उकालो दूरी बसमा करिब २० मिनेट लाग्छ । केबलकार निर्माण भएपछि केबलकारमा ९ मिनेटमा बन्दीपुर पुग्न सकिन्छ । केवलकारमा २ वटा सामान बोक्नेसहित १७ वटा बक्सा रहनेछ ।