पोखरा ।
जातीय विभेदको विरुद्ध तीन पात्रले गरेको साझा संघर्षको कथा समेटेको निर्माणाधीन नेपाली चलचित्र ‘पुजार सार्की’ले उठान गरेका सामाजिक विषयवस्तु माथि सिने संवाद गरिएको छ ।

मिजार समाज नेपाल, गण्डकी प्रदेश समितिले आयोजना गरेको कार्यक्रममा चलचित्रका तर्फबाट कलाकारहरू आर्यन सिग्देल, प्रदीप खड्का, निर्देशक दिनेश राउत, लेखक विकास सुवेदी, निर्माता सुभाष भुसाल लगायतको सहभागिता छ । एउटा कालखण्डमा पोखरा महानगरपालिका वडा नम्बर २४ कास्कीकोटमा भएको अन्तरजातीय विवाहको कथामा आधारित निर्माण गरिएको चलचित्रले उठान गरेका विषयवस्तु माथि संवाद गरिएको निर्देशक राउतले जानकारी दिए ।

‘कास्कीकोटका मार्कण्य अधिकारीले सार्की परिवारकी चेली ‘कली’सँग अन्तरजातीय प्रेमविवाह गरेका थिए,’ उनले भने, ‘जसको कारण अधिकारी कुल खान्दान र समाजबाट बहिष्कृत भए । पछि जात, थर त्यागेर पुजार सार्कीको पहिचानमा बाँचे । पुजार र कली आज यो लोकमा छैनन् ।’ उनले यही सामाजिक सत्य घटनामा आधारित चलचित्रले उठाएका विषयवस्तु माथि सरोकारवाला बीच खुला अन्तक्र्रिया र सिनेमा संवाद गरिएको बताए । चलचित्रमा अभिनेताहरु सिग्देल साथमा खड्का, पल शाह, अञ्जना बराइली, परीक्षा लिम्बु लगायत कलाकारले अभिनय गरेका छन् ।

अन्तर्राष्ट्रिय जाति तथा रंगभेद उन्मूलन दिवसको सन्दर्भमा भएको कार्यक्रममा संविधान सभा सदस्य दिलबहादुर नेपालीले चलचित्रले अन्तरजातीय विवाह सम्बन्धी मर्मस्पर्शी सामाजिक कथालाई प्रमुख विषय बनाएको बताए । उनले कथित उच्च जातीले अन्तरजातीय विवाहलाई सहज रुपमा स्वीकार नगर्नु सामाजिक समस्याको रुपमा रहेको उल्लेख गरे ।

संवादमा अभिनेता सिग्देलले जातीय विभेद गर्नु अन्धविश्वास मात्र भएको बताए । अभिनेता खड्काले आफू काठमाडौंमा जन्मेहुर्केका कारण यस प्रकारका कथाहरू सुनेको भएता पनि पहिलो पटक भोगेको प्रतिक्रिया दिए । उनले आफूले अभिनय गरिरहँदा ‘मैत बहादुर’ पात्रभित्र नै प्रवेश गरेको हुँदा आफ्नै कथा जसरी नै अभिनय गरेको उल्लेख गरे । खड्काले जातका आधारमा हुने विभेद आजको युगमा सहनै नसकिने अपराध भएको बताउँदै यो विभेद हटाउन सबै चेतनशील नागरिकबीच एकता हुन आवश्यक रहेको चर्चा गरे ।

लेखक सुवेदीले आफ्नो आँखाले देखेको कथालाई चलचित्रको कथामा रुपमा रुपान्तर गरेको जानकारी दिए । कार्यक्रममा चलचित्र युनिटलाई सम्मान पनि प्रदान गरिएको थियो । चलचित्र छायांकनको अन्तिम चरणमा छ । यसको छायांकन कास्कीको पोखरा २४ कास्कीकोट र आसपासमा चलिरहेको छ ।