लेखनाथ ।
लेखनाथ महिला उद्यमी कृषक समूह पोखरा २७ को अध्यक्षमा इन्दिरा रोका दोहोरिएकी छन् । संस्थाको सोमबार भएको तेस्रो साधारण सभा तथा दोस्रो अधिवेशनले उनलाई पुन अध्यक्ष चुनेको हो ।

समितिको उपाध्यक्षमा बुद्धिमाया थापामगर, सचिवमा शर्मिला श्रेष्ठ, सहसचिव माया सापकोटा र कोषाध्यक्षमा वन्दना शाह निर्वाचित भएका छन् । सदस्यमा जमुना गिरी, इन्दिरा लामिछाने, शर्मिला खड्का र ताराकुमारी अधिकारी छन् ।

नवनिर्वाचित समितिको पहिलो बैठलले सल्लाहकारमा लेखनाथ उद्योग बाणिज्य संघका अध्यक्ष विनोद श्रेष्ठ, महासिचव जानुका अधिकारी, पार्वती थापा, गंगा मल्ल, शान्ति खनाल, सन्ध्या दाहाल, सूर्यकुमारी बञ्जारा र विष्णुमाया गिरीलाई चयन गरेको छ ।

सभामा लेखनाथ उद्योग वाणिज्य संघका अध्यक्ष विनोद श्रेष्ठले महिलाको सक्रियता र क्रियाशीलतामा वृद्धि गर्दै उद्यमशीलताको विकास गर्नका लागि संघको भातृ संस्थाका रुपमा लेखनाथ महिला उद्यमी कृषक समूह स्थापना भएको जनाए ।

उनले महिला उद्यमीका उत्पादनलाई बजारीकरण गर्नका लागि संघ तत्पर रहेको उल्लेख गरे । उनले पोखरा महानरगपालिका लगायतका विभिन्न संघ, संस्था र निकायसँग सहकार्य र समन्वय गर्ने उनको भनाइ छ ।

कार्यक्रममा नेपाल उद्योग वाणिज्य महासंघका केन्द्रीय सदस्य बाबुराम गिरी, लेखनाथ उद्योग वाणिज्य संघका पूर्वअध्यक्षहरु लक्ष्मीप्रसाद त्रिपाठी र बलराम ढकाल, महासचिव जानुका पराजुली, समूहकी संस्थापक अध्यक्ष मेनुका श्रेष्ठ लगायतले बोलेका थिए ।

कार्यक्रममा सामुदायिक प्राकृतिक चिकित्सालय प्रस्तावित नेपाल प्राकृतिक चिकित्सा सामुदायिक शिक्षण अस्पताल रजहर नवलपरासीका डा. विमल पौडेलले प्राकृतिक चिकित्सा, खानपान, व्यायाम र योग लगायतका विषयमा प्रस्तुति राखेका थिए ।