पोखरा ।
जिल्ला प्रहरी कार्यालय कास्कीले मोबाइल चोरी गरेको आरोपमा एक युवकलाई पक्राउ गरेको छ । म्याग्दीका २० वर्षीय रुपेश रम्जालीलाई पोखराबाट पक्राउ गरिएको हो ।

निजको साथबाट आईफोन र सामसुङ मोबाइल बरामद गरिएको जिल्ला प्रहरी कार्यालय कास्कीका प्रहरी नायव उपरीक्षक बसन्तकुमार शर्माले जानकारी दिए ।

मोबाइल चोरी गरेर ईसेवा ह्याक गरेर १८ हजार १ सय २५ रुपैयाँसमेत ट्रान्सफर गरेको जाहेरीको आधारमा उनलाई पक्राउ गरिएको शर्माले बताए ।

पक्राउ परेका युवकले अनुसन्धानको क्रममा चोरी गरेको मोबाइल फेसबुकमा बिक्रीको लागि राख्ने गरेको र बिक्री पश्चात उक्त फेसबुक आइडी डिलिट गर्ने गरेको बयान दिएका छन् । प्रहरीका अनुसार उनले विभिन्न कम्पनीका १५÷१६ वटा चोरी भएका मोबाइल बिक्री गरेको जनाएको छ ।

जिल्ला अदालत कास्कीबाट चोरी तथा डाँका मुद्धामा ७ दिनको म्याद थप गरी अनुसन्धान अगाडि बढाएको कास्की प्रहरीले जनाएको छ ।