पोखरा ।
नेपालको प्रजातान्त्रिक आन्दोलनका अग्रज कीर्तिराज बरालको राजनीतिक, साहित्यिक, सामाजिक र शैक्षिक क्षेत्रका सिर्जनालाई समेटेर पुस्तक प्रकाशन गरिएको छ । पोखरा १३ आर्वा स्वाँरा माझघरका बरालको ८७ औं जन्म जयन्तीको अवसरमा ‘कीर्तिका रचना विविध’ नामक पुस्तक आइतबार लोकार्पण गरियो ।

कीर्तिराजद्वारा लिखित विविध रचना संगहमा आत्मवृतान्त, यात्रा स्मरण, घटनाक्रम, साहित्य विविध, वेदान्ती चरणका भजन र बराल वंशावली समेटिएको छ । साहित्यकार सरुभक्तले कृति लोकार्पण गर्दै कीर्तिका यात्रा स्मरण, साहित्यिक अभिरुचिलाई जीवनीमा समेटेर कृति प्रकाशन गरिएको बताए ।

हरेक व्यक्तिलाई आफ्नो जीवनलाई सार्थक बनाउन कृति प्रकाशन गर्ने चाहना सबैलाई हुने उल्लेख गर्दै उनले कीर्तिको कृति प्रकाशन गर्ने अभिलाषालाई परिवारले पूरा गरेको चर्चा गरे । ‘कीर्तिले जीवनका घटनाक्रम यात्रा स्मरणलाई लिपिबद्ध गरेर राखेका थिए ।

जसलाई कृतिको रुपमा छाप्नको लागि परिवारलाई आदेश दिएका थिए,’ उनले भने, ‘कीर्तिले साहित्य, शैक्षिक, राजनीतिक क्षेत्रमा गरेको योगदानलाई जीवन्त राख्न परिवार सफल भएको छ । पिताको आदेशलाई पालना गरेर छोराछोरीले पुस्तकको रुपमा प्रकाशन गरेका छन् ।’ उनले यात्रा स्मरण र नियात्रा साहित्यमा लोकप्रिय भएको बताए ।

नेपाली कांग्रेस गण्डकी प्रदेशका सभापति शुक्रराज शर्माले प्रजातान्त्रिक आन्दोलन, शैक्षिक क्षेत्रमा योगदान पुर्‍याएको कीर्तिका बारेमा जान्न र बुझ्ने अवसर किताबबाट मिल्ने उल्लेख गरे । उनलाई जान्ने र बुझ्ने विषय किताब पढेपछि परिपक्व बन्ने उनको भनाइ छ ।

प्राध्यापक रामेश्वर बरालले कृतिको समीक्षा गर्दै कीर्तिका आत्मवृतान्त, जीवनी, यात्रा स्मरण र साहित्य क्षेत्रका प्रमुख रचना पुस्तकमा समेटिएको जानकारी दिए । उनले कृतिमा आर्वाको रतन पाण्डे मन्दिर र महाप्रभुधामको स्थापनाको विषय समेत समेटिएको बताए । कार्यक्रममा परिवारको तर्फबाट शिवबहादुर बरालले कीर्तिको जीवनी प्रस्तुत गरे ।

कार्यक्रममा नेपाली कांग्रेस कास्कीका सभापति किशोरदत्त बराल, तारा पाखे, पार्वतीदेवी बराल, भवसागर बराल, रसोधा सुवेदी बराल लगायतले सामाजिक जागरण ल्याउन कीर्तिराजको योगदानमाथि चर्चा गरे ।