पोखरा ।

पर्यटन व्यवसायी महिला संघ (टेवान) पोखरा प्रवर्द्धन गर्न बैकंक, सिंगापुर र मलेसिया भ्रमणका लागी प्रस्थान गरेको छ ।

टोलीलाई पोखरा महानगरपालिकाका मेयर धनराज आचार्यले सोमबार विदाइ गरेका छन् । मेयर आचार्यले पोखरा प्रवर्द्धनका लागि टेवानको कार्य सराहनीय भएको बताउँदै भ्रमणको शुभकामना व्यक्त गरे ।

१० दिने भ्रमणमा बैकंक, सिंगापुर र मलेसियाका राजदुतावास, पर्यटन व्यवसायी, गैरआवासिय नेपाली संघसंस्थाका पदाधिकारीसँग भेटघाट तथा पोखराको प्रवर्द्धनात्मक कार्यक्रम गरिने टेवान अध्यक्ष कमला गिरीले जानकारी दिइन् । भ्रमण टोलीमा टेवानका पदाधिकारीसहित पत्रकार पनि सहभागी छन्।

विगत ७ वर्षदेखि पर्यटन प्रवर्द्धनका लागि महिला सहभागिता भन्ने नाराका साथ टेवानले महिला सशक्तिकरण, पोखरा प्रवर्द्धन लगायतका कार्यक्रम गर्दै आएको छ ।