तराई मधेसबाट काठमाडौं आउँदै गरेका २ वटा बस त्रिशुल नदीमा खसे । ४० जनाभन्दा बढी वेपत्ता छन् । बिहीबार रातिदेखि हराइरहेको खोजी नयाँ प्रविधि अनुसारै भइरहेको छ । ती बसका यात्रु सकुशल बाँचेर फर्किने आशा लगभग समाप्तप्राय जस्तै छ । ड्रोन क्यामेरा लगायतका उपकरण प्रयोग गर्दासमेत खासै उपलब्धि भएन । यस्तो उपक्रम त्रिशुलीमा बर्सेनि हुँदै आएको छ । हरेक वर्ष मुलुकका प्रमुख राजमार्गहरु बर्खाले भताभुंग हुन्छन् ।

गाडीमात्रै होइन पैदल यात्रुकै आउजाउ पनि रोकिन्छ केही दिन । पुलपुलेसा र कल्भर्टहरु बर्खाको भेलले बगाउँछ । सडकै पनि बगाउँछ । अनि भीरपाखा हुँदै बनेका सडकमा पहिरो खसेर बाटो छेक्दैन मात्रै गाडीहरु नै पनि पुर्छ । मानिसहरुको ज्यान जान्छ । त्रिशुली नदी किनारको पृथ्वीराजमार्गमा त गाडीहरु खसिरहन्छन् । बिहीबार मुग्लिङ नारायणगढ खण्डमा पहिरो खसेर बस बगाउँदै त्रिशुली पु¥यायो । मानिसहरु बेपत्ता भए ।

अधिकतर के देखिन्छ भने रातिको बेला पहिरो खस्छ । भीषण बर्खा लाग्दा केही दिन रातिको समयमा जोखिमका बाटोमा गाडी आउजाउ रोक्ने सुझाव विज्ञले दिएका छन् । त्यसलाई कार्यान्वयन गर्न ढिला भइसक्यो । यसपालिको पाठ र विज्ञको सुझाव आउँदो वर्षका लागि उपयोगी हुनसक्छ । तर त्यो दीघकालीन उपाय होइन । यसपालि सबैभन्दा धेरै पानी पर्ने भनिएको २९ असारसम्म हो । त्यसपछि पनि बर्खा त रहन्छ, तर जातिविधि पानी नपर्ला भन्ने मौसमय विभागको अनुमान छ । एउटा माघले जाडो जाँदैन भनेजस्तो एउटा असारले बर्खा पनि त कहाँ जान्छ र ? यो त वर्षैपिच्छे आइरहन्छ । त्यसैले बर्खाको जोखिम र त्यो पनि राजमार्गहरुमा कसरी गर्ने भन्ने दीर्घकालीन उपायको खोजी गरिनुपर्छ ।

कृष्णभीरको पहिरोले पृथ्वीराजमार्गमा धेरै वर्ष दुख दियो । मुग्लिङ नाराणगढ राजमार्गमा झन् धेरै वर्षदेखि धेरै पहिरो खस्दै आएका हुन् । धेरै वर्ष यो ३६ किलोमिटरको दुरी पार गर्न घन्टौं पनि बिताए यात्रुले । सडक निकैधेरै ठाउँमा ध्वस्त थियो । हालैको वर्षमा सडकको स्तरोन्नति त भएको छ, तर जोखिम उत्तिकै छ । सडकदेखि भित्तातिर जुन खालको इन्जिनियरिङ गर्नुपर्ने हो, त्यो वैज्ञानिक तवरको भएन कि भन्ने शंका नाजायज लाग्दैन । तर धेरै हदसम्म यो सडक सुधारिएको छ । अब जोखिमका ठाउँ पहिचान गरी इन्जिनियरिङ गर्नुपर्छ । सडकबाट नदीतिर गाडी नखसनून् भनेर आवश्यक ठाउँमा बार बन्देज गर्नुपर्छ । जोखिम हुँदाका बखत सकर्तताको घन्टी बज्ने र आवश्यक पर्दा केही समय गाडी आउजाउ रोक्ने प्रणाली बसाउनुपर्छ ।