पोखरा ।
कास्कीको मादी गाउँपालिका वडा नम्बर १२ लिपेयानीका पहिरोबाट प्रभावित एक परिवारलाई नेपाल रेडक्रस सोसाइटी कास्कीले शुक्रबार राहत प्रदान गरेको छ ।

बिहीबार रातिको अविरल वर्षाको कारण पहिरोबाट घर पूर्ण रुपमा क्षति भएका पुष्पराज बराललाई खाद्य तथा गैरखाद्य राहत प्रदान गरेको रेडक्रस सोसाइटी कास्कीका उपसभापति धर्मराज अधिकारीले जानकारी दिए । अविरल वर्षाका कारण बरालको १ तले कच्ची घरपछाडि अन्दाजी ७ मिटर माथिबाट ढिस्को अचानक झर्न जाँदा घर जोखिममा परेको छ ।

बरालको कुखुराको खोर पहिरोले बगाएको छ । पहिरोमा झुण्डिएको घरबाट मानिसलाई बिहीबार राति नै छिमेकीको घरमा सारिएको नेपाल रेडक्रस सोसाइटी कास्कीका विपद् शाखाका संयोजक नवराज भण्डारीले बताए । पहिरोले मानवीय तथा पशुचौपायासहित कुनै अन्य क्षति भएको छैन । उक्त घरमा ४ जना बस्दै आएकोमा सरसामानसमेत सुरक्षित स्थानमा स्थानान्तरण गरिएको छ ।

गण्डकी प्रदेशका भौतिक पूर्वाधार विकास तथा यातायात व्यवस्था मन्त्री प्रकाशबहादुर केसी, गण्डकी प्रदेश सभाका सदस्य बेदबहादुर गुरुङ, नेपाल रेडक्रस सोसाइटी गण्डकी प्रदेशका अध्यक्ष सूर्यप्रसाद ढकाल लगायतको टोलीले शुक्रबार पहिरोबाट प्रभावितको स्थलगत अवलोकन गरेको छ । मन्त्री केसीले नेपाल प्रहरी, मादी १२ को वडा कार्यालयले पहिरोबाट प्रभावितको मुचुल्का तयार पारेर क्षतिको विवरण यकिन भएपछि प्रदेश सरकारले गर्न सक्ने सहयोग गर्ने आश्वासन दिए ।