जोमसोम ।
पछिल्लो समय हिमालपारिको सडक समृद्ध गएको छ । बेनी जोमसोम कोरला) सडक अन्तर्गत जोमसोम कागबेनी कालोप सडक अन्तिम चरणमा पुगेको छ । सडक निर्माणका लागि २०७८ असोज ४ गते रौटाहा आत्रेय सारस जेभीसँग २८ करोड १४ लाखमा ठेक्का सम्झौता भएको थियो ।

तिब्बतसंग सीमाना जोडिएको कोरला नाका र हिन्दु तथा बौद्धमागीको साझा धार्मिक तीर्थस्थल मुक्तिनाथ जोड्ने कालोपत्र सडक निर्माणका लागि हस्तान्तरण भइसकेको ग्राभेल सडकमा कालापत्र तथा सडक स्तरोन्तति गर्न ३ वर्षअघि संघीय सरकार अन्तर्गत भौतिक पूर्वाधार मन्त्रालयले ठेक्का सम्झौता गरेको थियो । यो जोमसोममाथि उत्तरी भेगमा आयोजनाको पहिलो कालोपत्र सडक हो ।

कोरला सडक आयोजनाका सूचना अधिकारी विष्णु चापागाईले निर्माणाधीन जोमसोम कागबेनी कालोपत्र सडकको काम अन्तिम चरण पुगेको बताए । सडकको म्याद २ वर्ष तोकिएकोमा त्यसपछि आयोजनाले थप १ वर्ष म्याद थपेको थियो । जोमसोम कागबेनी १३ किमी कालोपत्र सडक तथा स्तरोन्नतिको पछिल्लो भौतिक प्रगति ९५ प्रतिशत र वित्तीय प्रगति ९० प्रतिशत छ ।

सडकको काम करिब पूरा भइसकेको र अहिले सडक मार्किङका लागि रंगरोगन, सडक रेलिङ र साइनबोर्ड राखिँदै गरेको चापागाईले सुनाए । जोमसोम कागबेनी कालोपत्रे सडकको काम पहिलो पटक थपिएको समयअवधि भन्दाअगावै सम्पन्न हुने उनले जनाए ।

यता, निर्माण कम्पनीले एक साताभित्रै १३ किमी कालोपत्र सडक तयार हुने जनाएको छ । निर्माण कम्पनीले कागखोला आसपास सडक ग्रोभल भइसकेको र १ किमीमा कालोपत्रे गर्न बाँकी रहेको जनाएको छ ।

जोमसोमबाट कागबेनी पुग्ने सडक कालोपत्रेको काम अन्तिम चरणमा छ

यसअघि ठेक्का सम्झौता भएको सुरुवाती चरणबाटै आन्तरिक समस्याका कारण ढिलासुस्ती भएकोमा न्वाइन निर्माण कम्पनी आत्रेयले काम गर्न नसकेपछि जोमसोम कागबेनी सडक अलपत्र परेको थियो । निर्माण कम्पनीलाई पटक पटक काममा फर्किन आयोजनाले ताकेता गरेपछि रौटाहा साँढे २ वर्षपछि कालोपत्रे सडक निर्माणको काममा फर्किएको थियो ।

रोटाहाले अलपत्र परेको निर्माणाधीन जोमसोम कागबेनी सडकलाई तीव्रता दिएसँगै पर्यटन व्यवसायी तथा सरोकारवाला खुसी भएका छन् । लोमान्थाङ गाउँपालिका ५ लोमान्थाङका वडा सदस्य छेवाङ रिन्जिङ गुरुङले उपल्लो मुस्ताङ र कोरला सडक जोड्ने जोमसोम कागबेनी कालोपत्र सडकले मुस्ताङबासीलाई उत्साहित तुल्याएको बताए । उनले विगतमा उपल्लो मुस्ताङ जान सडक असहज हुँदा समस्या पर्ने गरेकोमा अब कालापत्र हुँदै गएमा जोमसोमबाट साँढे २ घण्टामै कोरला पुग्न सकिने दाबी गरे ।

आयोजना अन्तर्गत १३ किमी कालोपत्र सडकमध्ये १२ किमी मुख्य राजमार्ग सडकमा र १ किमी मुख्य राजमार्ग सडकदेखि कागबेनी श्राद्धस्थलसम्म कालोपत्रे सडक विस्तार भइसकेको छ । मुस्ताङको कागबेनी र ताङ्बे गाउँको मध्यभागसम्म सडक कालोपत्र बनिसकेको छ ।

जोमसोम कागबेनी कालोपत्रका लागि यसअघिको ग्राभेल सडकलाई चौडा गर्ने, कटिङ गर्ने, ग्रेड मिलाउने, मेसिनरी वाल निर्माण र वाल तथा सडकको आवश्यक स्थानमा ड्रेन निर्माण लगायतका काम गर्ने जिम्मेवारी तोकिएको थियो । यसअघि सुरु गरेको आत्रेयले नसकेको काम रौटाहाले ६ महिनामै कालोपत्र सडक सक्ने गरी फिल्डमा जनशक्ति तथा उपकरण परिचालन गरेको थियो ।

राष्ट्रिय गौरवको सडक अन्तर्गत २०७४ मा जोमसोम कोरला १ सय १० किमी सडक ७ खण्डमा ग्राभेल सडक स्तरोन्नति सुरु गरिएको थियो । ग्राभेल सडक अन्तर्गत चराङ छोसेर ठेकेदारको ढिलासुस्तीले गर्दा अन्तिम चरणमा पुगेर रोकिएको छ भने बाँकी ६ खण्ड ४ वर्षअगावै आयोजनालाई हस्तान्तरण भइसकेका छन् ।

हस्तान्तरण भइसकेको पहिलो खण्ड जोमसोम कागबेनी सडकमा ३ वर्षअघि सडक विभागले पहिलो पटक कालोपत्र गर्न ठेक्का आहवान गरेको थियो । आयोजनाले राष्ट्रिय गौरवको सडक अन्तर्गत बेनी जोमसोम र जोमसोम कोरला सडकमा गरी करिब ८० किलोमिटरमा कालोपत्र भइसकेको जनाएको छ ।

बेनी जोमसोम सडकको तेस्रो र चौथो खण्डमा करिब ८० प्रतिशत कालोपत्र भइसकेको छ । म्याग्दी खण्डमा पनि केही भागमा कालोप गरिएको छ । राष्ट्रिय गौरवको बेनी जोमसोम कोरला सडक सहज बन्दै गउपछि मुस्ताङ भ्रमण गर्ने पर्यटक बढेका छन् भने यहाँ आर्थिक क्रियाकलापमा पनि बढोत्तरी भएको छ ।