पोखरा ।
नेकपा एमाले गण्डकी प्रदेश कमिटी सदस्य अर्जुन अधिकारीलाई मातृशोक परेको छ । पोखरा १९ घार्मी निवासी अर्जुनकी आमा ६० वर्षीया दुर्गादेवीको शुक्रबार बिहान निधन भएको हो ।

२०२१ असोज ९ गते पोखरा १८ मेथ्लाङमा जन्मिएकी दुर्गाका श्रीमानको १० वर्षअघि नै मृत्यु भइसकेको छ । सामान्य उपचारका लागि शुक्रबार बिहान पश्चिमाञ्चल क्षेत्रीय अस्पताल पुगेकी दुर्गाको हृदयघातका कारण निधन भएको परिवारिक स्रोतले जानकारी दिएको छ ।

दुर्गाको स्थानीय गोस्तेघाटमा अन्त्येष्टि गरिएको छ । उनका छोरा अर्जुन र २ छोरी छन् । दुर्गाको पार्थिव शरीरमा एमाले स्थायी कमिटी सदस्य खगराज अधिकारी, नेता मायानाथ अधिकारी र भीमबहादुर कार्कीले पार्टीको झण्डा ओढाएर अन्तिम श्रद्धाञ्जली अर्पण गरेका थिए । दुर्गाले घार्मीको विकास, निर्माण तथा महिला सशक्तीकरणको क्षेत्रमा योगदान गरेकी छन् ।