पोखरा । नेपाल प्रहरीका पूर्वडीआइजी छविलाल जोशीलाई थप समय थुनामा राखेर सहकारी ठगी मुद्दामा अनुसन्धान गर्न कास्की प्रहरीले कास्की अदालतबाट थप २० दिनको अनुमति लिएको छ । पोखराको सूर्यदर्शन सहकारी ठगी प्रकरणमा जोशी मुछिएका छन् । उनलाई असोज ६ गते पक्रेर पोखरा ल्याई जिल्ला प्रहरी कार्यालय कास्कीको हिरासतमा राखिएको छ ।

पहिलोपटक असोज ७ गते ५ दिन थुनामा राख्ने अनुमति अदालतले प्रहरीलाई दिएको थियो । दोस्रोपटक ७ दिनको म्याद थियो । लगत्तै दसैं विदा परेकाले अदालत विदा हुँदा जोशी हिरासतमै रहे । अदालत खुलेपछि विदाको बेलाको समेत गरी २० दिनको म्याद शुक्रबार प्रहरीले जोशीलाई थुन्न पाएको छ ।