पोखरा ।
पोखरा १४ चाउथेमा अवस्थित कास्की मोर्डनाइज्ड एकेडेमीमा नेपाल जुनियर युवा रेडक्रस सर्कल कास्की मोर्डनाइज्ड एकेडेमीद्वारा सिनियरतर्फ अन्तर सदानात्मक भलिबल प्रतियोगिता र पूर्वप्रावितर्फ गायन तथा नृत्य प्रतियोगिता आयोजना गरेको छ ।

विद्यालय प्राङ्गणमा सञ्चालित भलिबल प्रतियोगिता राष्ट्रिय भलिबल रेफ्री ईश्वर आलेलाई विद्यालयका संस्थापक प्राचार्य रामबहादर मोचीले बल हस्तान्त्रण गरी उद्घाटन गरेका थिए । मोचीले भलिबलले एकतिर राष्ट्रको पहिचान गराउने र अर्कोतर्फ खेलाडीको शारीरिक विकासमा पनि सघाउने जनाए । उनले अनुशासनलाई व्यवहारिक रुपमा लागू गर्ने सीप विकासका लागि समेत खेलको विशेष भूमिका हुने उनको भनाइ छ ।

भलिबल प्रतियोगितामा छात्रातर्फ रातो सदन प्रथम र सेतो सदन द्वितीय भएका थिए । छात्रतर्फ नीलो सदन र रातो सदन क्रमशः प्रथम र द्वितीय ठहरिए । पूर्व प्रावितर्फको गायन तथा नृत्य प्रतियोगिता विद्यालय व्यवस्थापन समिति अध्यक्ष राधा नेपालीले सुरुआत गरिन् । उनले साना विद्यार्थीलाई यस्ता कार्यक्रमले एकातिर मनोरञ्जन दिने र अर्कोतिर उनीहरुको क्षमतामा विकास गर्ने जनाइन् ।

कार्यक्रममा गायनतर्फ वैल्सन विक, उमंग गुरुङ, समान बराल र एरिस अर्याल क्रमशः प्रथम, द्वितीय, तृतीय र सान्त्वना भएका थिए । नृत्यतर्फ प्राप्ति लौडारी, रोनभ विक, डोल्मा गुरुङ र मेरिन्स शाही क्रमशः प्रथम, द्वितीय, तृतीय र सान्त्वना बने ।

कार्यक्रमको अध्यक्षतामा सर्कलकी अध्यक्ष आयुषा बास्तोलाले गरेकी थिइन् । कार्यक्रममा शिक्षक नायक निरोज केसी, अनुराग अधिकारी र शिबु ढकालले पनि बोलेका थिए ।