समाधान, काठमाडौ

राष्ट्रिय पूननिर्माण प्राधिकरणका करिब चार हजार प्राविधिकहरुले बिहिवारबाट लागु हुने गरि सामूहिक राजीनामाको घोषणा गरेका छन् ।

राष्ट्रिय पूननिर्माण प्राधिकरण प्राविधिक राष्ट्रिय हकहित संरक्षण समितिले बिहिवार काठमाडौंमा पत्रकार सम्मेलन गर्दै यस्तो घोषणा गरेको हो । आफूहरुले अघि सारेका मागप्रति सरकार संवेदनशील नभएकाले बाध्य भएर सामूहिक राजीनामा दिएको समितिको ठहर छ ।

समितिले गत चैत्र ३ गतेबाट देशव्यापी आन्दोलन गर्दै आएको थियो । तर, सरकारले आफ्ना जायज मागको सुनुवाई नगरी सेवा सुविधाबाट बञ्चित गराएकाले बाध्य भएर सामूहिक राजीनामा दिनु परेको समितिका अध्यक्ष ई। अविनाश अमरले स्पष्ट पार्नुभयो ।

यता केन्द्रीय आयोजना कार्यान्वयन इकाईका आयोजना निर्देशक नवराज प्याकुरेलले पुनर्निर्माण प्राविधिकहरुहरुको माग पुरा भइसकेको दाबी गर्नुभयो । उहाँले प्राविधकहरुको मागका बारेमा मन्त्रीपरिषद्मा समेत जानकारी गराइसकेको बताउनुभयो ।

पुनर्निर्माण प्राविधीकहरुले आफूहरुले खाईपाई आएको प्रोत्साहन भत्ता, भौगोलिक भत्ता, यातायात खर्च र सञ्चार खर्च निरन्तर पाउनुपर्ने, प्रत्येक स्थानीय तहमा पुनर्निर्माण शाखा अनिवार्य रुपमा हुनुपर्ने, स्थायित्व र निरन्तरताको व्यवस्था गरिनुपर्नेलगायतका विभिन्न ५ बुँदे माग राख्दै आएका छन ।