समाधान संवाददाता
पोखरा

लायन्स क्लब अफ अन्तर्राष्ट्रिय डिस्ट्रिक्ट ३२५ बी १ नेपालको साताैं राष्ट्रिय महाधिवेशन पोखरामा शुक्रबार सुरु हुँदै छ । महिलामात्र सदस्य भएका २६ लायन्स क्लबको अग्रसरतामा वैशाख १३ र १४ गते पोखरा प्रदर्शनी केन्द्रमा महाधिवेशन गर्न लागिएको हो ।

डिस्ट्रिक्ट अन्तर्गतका करिब ४ हजार लायन्सको सहभागिता रहने महाधिवेशनको तयारी ९० प्रतिशत पूरा भएको मुल आयोजक समितिका संयोजक डिस्ट्रिक्ट डिपार्टमेन्ट चिफ विमला श्रेष्ठले जानकारी दिइन् ।

उनले महाधिवेशनको लागि २ हजार लायन्स सदस्यले प्रि रजिस्ट्रेसन गरेको बताइन् । ‘महाधिवेशन सफल पार्न २७ सदस्यीय मुल आयोजक समिति गठन गरिएको छ । विभिन्न ३४ उपसमिति जिम्मेवारीसहित महाधिवेशनको तयारीमा जुटेका छन,’ संयोजक श्रेष्ठले भनिन्, ‘महाधिवेशनलाई सफल पार्न सम्पूर्ण लायन्स तथा लियो क्लब भएका छन् । लायन्स पाहुनाको लागि दृश्यावलोकनको समेत व्यवस्था गरिनेछ ।’

उनले नेपाल भ्रमण वर्ष २०२० सुरुआत हुनुभन्दा अघि हुन लागेको महाधिवेशनले पर्यटन प्रबद्र्धनमा सहयोग पुग्ने दाबी गरिन् ।

पर्यटन प्रबद्र्धनको लक्ष्यसहित आयोजना गर्न लागिएको महाधिवेशनबाट विश्व सामु चिनाउन र पर्यटन प्रबद्र्धनमा सहयोग पुग्ने संयोजक श्रेष्ठले उल्लेख गरिन् । महाधिवेशनमा सहभागिताको लागि दर्ता शुल्क २ हजार ५ सय कायम गरिएको छ । महाधिवेशन गर्न ७५ लाख ५० हजार खर्च लाग्ने अनुमान आयोजकको छ ।

डिस्ट्रिक्ट गभर्नर अशोककुमार श्रेष्ठले महिला लायन्स क्लबको व्यवस्थापनमा हुने महाधिवेशन अभूतपूर्व सफल हुने बताए । उनले सेकेन्ड भाइस गभर्नर पदमा मिलाउने प्रयास गरे पनि सफल नभएको उल्लेख गरे । लायन्स क्लब प्रजातान्त्रिक पद्धतिमा विश्वास राख्ने संस्था भएको उनको तर्क थियो ।

महाधिवेशनका लागि गभर्नर पदमा ईन्दु लम्साल र फस्ट भाइस गभर्नर पदमा मन रोकाको उम्मेदवारी छ । दुवैले महाधिवेशनबाट ‘एस’मत लिनुपर्ने व्यवस्था छ । सेकेन्ड भाइस गभर्नर पदमा विश्वेश्वर आचार्य र ध्रुवबहादुर श्रेष्ठबीच प्रतिस्पर्धा हुनेछ । महाधिवेशनमा वर्षभरिको कामको समीक्षा छलफल र महत्वपूर्ण निर्णय गरिने संयोजक श्रेष्ठले बताइन् ।

कार्यक्रममा मूल आयोजक समितिका सहसंयोजक मिलन थापा, सचिव विधाता श्रेष्ठ द्वा, प्रचारप्रचार संयोजक खिमा गुरुङ लगायतले बोलेका थिए ।