कृष्ण न्यौपाने
दमौली

व्यास नगरपालिकाले आयोजना गरेको नगरस्तरीय राष्ट्रपति रनिङसिल्डको उपाधि दमौलीस्थित सत्यवती माध्यमिक विद्यालयले जितेको छ । सोमबार सम्पन्न प्रतियोगितामा कुल ४१ पदक जित्दै सत्यवतीले रनिङसिल्डको उपाधि हात पारेको हो ।

सत्यवतीले २० स्वर्ण, ११ रजत र १० कास्यपदक जितेको छ । प्रतियोगितामा २३ पदकसहित व्यास नगरपालिका १ स्थित निर्मल माध्यमिक विद्यालय द्वितीय र ५ पदकसहित व्यास नगरपालिका ६ स्थित महेन्द्रज्योति माध्यमिक विद्यालय तृतीय भएको छ ।

निर्मलले ८ स्वर्ण, ६ रजत र ९ कास्य पदक जितेको छ भने महेन्द्रज्योतिले ३ स्वर्ण र २ रजत पदक जितेको प्रतियोगिताको व्यवस्थापन विद्यालय निर्मल माध्यमिक विद्यालयका प्रधानाध्यापक गणेशचन्द्र बस्नेतले जानकारी दिए । प्रतियोगितामा नगरभित्रका सामुदायिक र संस्थागत गरी ३७ विद्यालयको सहभागिता थियो ।

प्रतियोगितामा कुल ३४ स्वर्ण, ३५ रजत र ४१ कास्य पदक वितरण गरिएको थियो । प्रतियोगितामा दौड, सटफुट, ट्रिपल जम्प, हाइजम्प, लङजम्प, ज्याभलिङ थ्रो, भलिबल, कबड्डी, कँराते लगायतका खेल भएका थिए । विजेतालाई पुरस्कार वितरण गर्दै व्यास नगरपालिकाका प्रमुख बैकुण्ठ न्यौपानेले खेलकुदले मानिसलाई सभ्य र असल नागरिक बनाउने बताए ।