बेनी–जोमसोम सडकको म्याग्दी खण्डमा सास्ती भोग्दै पर्यटक

तस्विरः समाधान

समाधान संवाददाता
मुस्ताङ

वर्खा लागेपछि मुस्ताङ घुम्न आउने घटेका छन् । कालिगण्डकी करिडोरको बेनी–जोमसोम सडकखण्डका दर्जनौं स्थानमा बाढी, पहिरो जान थालेपछि मुस्ताङ यात्रा कठिन बनेको आयोजनाका सुपरभाइजर इन्द्रसिह शेरचनले बताए ।

बन्दै गरेको सडकको म्याग्दी खण्डमा एक सातादेखि पहिरो जाने क्रम रोएिको छैन । शाखा नदीहरुको बाढी र पहिरोले मुस्ताङतर्फ आउजाउ गर्ने सवारी साधन तथा यात्रु घण्टौं जाममा पर्ने गरेका छन् । मंगलबार दिउसो१२ बजेदेखि अवरुद्ध अन्नपूर्ण गाउँपालिका ३ काभ्रेभीरको करिब १ किलोमिटर सडकको पहिरो बुधबार पन्छयाइएको छ । करिडोर सडकको डोजरले पहिरो पन्छ्याएपछि सडक चालु भएको सुपरभाइजर शेरचनले बताए ।

काभ्रेभीरमा पहिरो पन्छ्याए पनि म्याग्दीकै रघुगंगा गाउँपालिका २ बैसरीमा भने सवारी आउजाउ गर्न समस्या छ । गत बर्ष बैसरीमा गएको पहिरो गएकै ठाउँमा लेदो जमेर सडक हिलाम्मे हुँदा यहाँ सवारी फस्ने गरेका छन् । बेनी–जोमसोम सडककै म्याग्दी खण्डको अन्नपूर्ण गाउँपालिका ३ रुप्से झरनाको जलथलेमा पनि पहिरो गएको थियो ।

ठाउँ ठाउँमा पहिरो र बाढीले सडक अवरुद्ध बनाउँदा मुस्ताङ जाने यात्रु निर्धारित समयमा गन्तव्य पुग्न नसक्ने अवस्था बनेको हो । बर्खायामको समयमा म्याग्दी खण्डमा बढी मात्रामा वर्षा हुने र निर्माणधीन करिडोर सडकको मेसिनले सडक माथिको धरातल कमजोर बनाएकाले पहिरो जाने क्रम बढेको हो । म्याग्दी खण्डमा नियमित पहिरो र बाढी आए पनि आयोजनाको डोजरले सडक निरन्तर सडक खुलाइरहेको आयोजना प्रमुख मुकुन्द अधिकारीले जानकारी दिए ।

वर्खा लागेपछि सुनसान
वर्षात लागेपछि मुस्ताङसुनसान बनेको छ । मानो खाएर मुरी उब्जाउने समयमा जताततै सडक अवरुद्ध हुन्छ । जिल्ला ट्राफिक कार्यालय मुस्ताङका सई दीनानाथ शर्माले मुस्ताङमा सवारी साधनको चाप कम हुँदै गएको बताए । उनले दैनिक साना ठूला गरी १० देखि १५ वटासम्म गाडी भित्रिने गरेको जानकारी दिए । वैशाखदेखि जेठसम्म र भदौदेखि कार्तिकसम्म दैनिक सयौं सवारी मुस्ताङ आउजाउ गर्छन् ।

मौसम प्रतिकूल हुँदा पोखरा–जोमसोम हवाई सेवासमेत नियमित हुन नसकेको जोमसोम नागरिक उड्यन कार्यालयका प्रमुख भानुभक्त कोइरालाले जानकारी दिए । उनले विस्तारै हवाइ उडानसमेत न्यून हुँदै गएको बताए ।