समाधान संवाददाता, पोखरा

उच्च अदालत बार एसोसियसन पोखराको वार्षिक साधारण सभा भएको छ । एसोसियसनको सभामा नेपाल बार एसोसियसनका उपाध्यक्ष सुरेन्द्र थापामगरले सरकारलाई न्यायको बाटोमा हिडाउने जिम्मेवारी बारको भएको बताए । उनले सरकारको प्रतिपक्षका रुपमा बारमात्र रहेकोे उल्लेख गरे ।

बार एसोसियसनका महासचिव लीलामणि पौडेलले नेपाल बारका गतिविधिका बारेमा जानकारी गराउँदै न्यायाधीश चयन प्रक्रियामा निश्पक्षता हुन सके न्यायप्रणालीमा शुद्धता आउने बताए । उनले बारले शुद्धता बनाउन पहल गर्ने अभियान थालनी गरिसकेको बताए । सचिव विनोद रेग्मीले पेश गरेको वार्षिक प्रगति प्रतिवेदन र कोषाध्यक्ष माधवी पान्डेयले प्रस्तुत गरेको आर्थिक प्रतिवेदन सर्वसम्मत पारित भएको थियो ।

उच्च अदालत बार एसोसियसन पोखराका अध्यक्ष रोहितराज बास्तोलाको अध्यक्षता भएको कार्यक्रममा नेपाल बारका पूर्व महासचिव माधव बास्कोटा, भूपनिधी पन्त, बारका पूर्व अध्यक्ष मुकुन्दराज अर्याल, डिएलए कास्कीका अध्यक्ष बिष्णुप्रसाद शर्मा, एनएलएका अध्यक्ष सुकदेव गौतम, जानकी शर्मा लगायतले बोलेका थिए ।