जोमसोम गुम्बा नजिक पर्यटकको गुल्जार । तस्बिरः एसके थकाली

एसके थकाली
जोमसोम

दसैं सकिएलगत्तै मुस्ताङमा पर्यटक सरगर्मी बढेको छ । पर्वपछिको लामो बिदामा बसेका स्कुल तथा कलेज विद्यार्थी, कार्यालयका कर्मचारी, वित्तीय संस्था, आमा समूह, जनप्रतिनिधि, टोल, समाज लगायत मुस्ताङ भ्रमणले मुस्ताङको पर्यटन व्यवसाय गर्मिएको हो । मुक्तिनाथ दर्शन तथा मुस्ताङ घुम्न भारतीय तथा विदेशी पर्यटकसमेत वृद्धि भएपछि मुस्ताङ गुल्जार छ ।

जिल्ला ट्राफिक कार्यालय इन्चार्ज सई बद्रीनाथ शर्माका अनुसार दसैंदेखि हालसम्म करिब ७ हजार पर्यटक भित्रिएका छन् । दसैैंपछि हालसम्म ५ हजार ४ सय ११ सवारी साधन भित्रिएका छन् । उनका अनुसार मुस्ताङको मुक्तिनाथ दर्शन गर्न र मुस्ताङको भूगोलसँग रमाउन स्कुल तथा कलेजका विद्यार्थी बढी आएका छन् ।

पोखरा–जोमसोम हवाई सेवाको उडानसमेत वृद्धि भएको छ । यहाँ उडान भर्ने तारा र समित एअरलाइन्सले दैनिक १२ वटासम्म उडान गरेको तारा एअरलाइन्सका कर्मचारी दुर्गा पुनले जानकारी दिए । उनका अनुसार जोमसोम आउने टुइनटर जहाजले १ पटकमा १८ यात्रु बोक्छन् । यसको अनुपातमा दैनिक २ सय पर्यटक आकाशमार्ग भएर मुस्ताङ आउने गरेको उनको भनाइ छ । हवाई सेवामार्फत मुस्ताङ आउनेमा विदेशी पर्यटक बढी छन् ।

पर्यटकको आगमनसँगै यहाँका साना ठूला सबै होटल भरिभराउ छन् । पर्यटकले जोमसोम भरिएपछि नजिकैको ठिनी होमस्टेमा समेत पर्यटक पुग्ने गरेको होमस्टे सञ्चालक जुमा थकालीले बताइन् । उनका अनुसार दसैंलगत्तै होमस्टेमा दैनिक २० देखि १ सय पर्यटक बास बस्न आउने गरेका छन् ।

दसैं बिदामा आएका युवा पर्यटक यसपटक कोरलानाका तथा लोमान्थाङसम्म पुग्ने गरेका छन् । उपल्लो मुस्ताङमा दैनिक २० देखि ५० वटासम्म मोटरसाइकल सवार युवा पुगेको बताइएको छ । यसअघि दसैं अघिको सोह्रश्राद्ध तिथिमा करिब २० हजार तीर्थालु श्राद्ध गर्न मुस्ताङ आइपुगेका थिए ।