विकास रोकामगर
पोखरा

१३ औं दक्षिण एसियाली खेलकुद (साग) अन्तर्गत हुने फुटबल प्रतियोगिताका लागि अखिल नेपाल फुटबल संघ (एन्फा)ले खेल तालिका ‘टाइसिट’ निकालेको छ । टाइसिट अनुसार पुरुष फुटबल प्रतियोगितामा ६ राष्ट्र र महिलातर्फ ४ राष्ट्रमात्रै भिड्ने भएका छन् ।

मंसिर १५ देखि सुरु हुने साग खेलमा पुरुष फुटबल काठमाडौंमा हुने छ भने महिला फुटबल पोखरामा हुने तय छ । जारी टाइसिटका अनुसार नेपालको पहिलो खेल मंसिर १७ गते श्रीलंकाविरुद्ध हुने छ । नेपालका लागि श्रीलंका बलियो प्रतिद्वन्द्वी भने होइन ।

सागको अघिल्लो संस्करणमा भारतको गुवाहाटीमा भएको खेलमा श्रीलंकालाई ४–०को फराकिलो अन्तरले पराजित गरेको थियो । त्यसअघिका संस्करणमा पनि श्रीलंकाले नेपालमाथि दबाब कायम राख्न सकेको छैन । बंगलादेशको ढाकामा ११ औं संस्करणमा प्रवेश पाएको महिला फुटबल टोलीले त्यतिबेला पनि श्रीलंकालाई ८–० को फराकिलो अन्तरले पराजित गरेको थियो ।

श्रीलंकापछि नेपाल मंसिर १९ गते माल्दिभ्स र २१ गते भारतसँग प्रतिस्पर्धा गर्ने भएको छ । सहभागी राष्ट्र थोरै र मैदानको अवस्थाका कारण पनि प्रत्येक खेलपछि १ दिन खेल रोकिएको छ । राउन्ड रोबिन लिगबाट शीर्षस्थानमा उक्लिने २ टिम मंसिर २३ गते फाइनलमा भिड्ने छन् ।

पोखरा रंगशालामा हुने साग महिला फुटबलका लागि खेलाडीसहित सागका लागि ३७ जना अफिसियल टोली नेपालको प्रतिनिधित्व गर्नेछन् । १३ औं साग महिला फुटबल प्रतियोगितामा गोल रक्षकका रुपमा एन्जिला तुम्बापो, अञ्जना रानामगर र उषानाथ छन् ।
डिफेन्डरमा गीता राना, पुनम जर्घामगर, अमृता जैसी, हीराकुमारी भुजेल, कविता धिमाल, मनमाया लिम्बु र पुजा राना उभिनेछन् । मिडफिल्डरमा रेनुका नगरकोटे, दीपा राई, सरु लिम्बु, इन्दिरा राई, अनिता बस्नेत, मन्जलीकुमारी योन्जन, विमल चौधरी छन् । परवार्डको जिम्मा सावित्री भण्डारी, नीरु थापा, अनीता केसीले सम्हाल्ने भएका छन् ।

भारत बाधक, तर हारको बदला लिने मौका
दक्षिण एसियाली राष्ट्रमा महिला फुटबलमा नेपाल र भारत उत्कृष्ट मानिन्छन् । नेपालले बाँकी राष्ट्रसँग यसअघिका साग संस्करणमा अविजित यात्रा तय गरे पनि भारतसामु निरीह बन्न पुगेको छ । त्यसकारण पनि गृह मैदानमा भारतलाई जितेर इतिहास रच्ने मौका नेपाली टिमलाई छ ।

यसअघिका सबै संस्करणमा भारत स्वर्ण पदक विजेता बन्दै आइरहेको छ । नेपाल रजत पदकमै चित्त बुझाएर स्वदेश फर्किनुपर्ने बाध्यता थियो । भारतमा भएको यसअघिको संस्करणमा नै नेपाल भारतलाई जितेर स्वर्ण पदक हात पार्ने दाउमा थियो । तर, गृह मैदानमा उत्रिएको भारतीय टोलीसँग नेपालले भारतसँग ४–० को लज्जास्पद हार व्यहोर्नु प¥यो ।

जारी संस्करणमा नेपाल गृह मैदानमा छ । अर्थात अघिल्लो संस्करणमा गृह मैदानमा भारतले दिएको चुनौतीलाई यस संस्करणमा पूरा गर्नुपर्ने दबाब नेपाललाई छ । नेपालले हालसम्म रजतमामात्रै चित्त बुझाइरहेको छ । पूर्व राष्ट्रिय खेलाडी हरि खड्काको प्रशिक्षणमा मैदानमा उत्रिन लागेको नेपाली महिला टिमले कस्तो खेल प्रदर्शन गर्लान् ? त्यो भने हेर्न बाँकी छ ।

मैदान पनि बाधक !
१३ औं साग अन्तर्गत पोखरामा हुने तय भएको महिला फुटबल प्रतियोगिता कात्तिक १७ देखि हुने प्रतियोगिताका लागि भने मैदान अझै तयार भइसकेको छैन । पोखरा रंगशालाको प्यारापिट, दुबो विस्थापन लगायतका काम बाँकी छन् ।

मैदानमा ढिलो गरी रोपेको दुबो सर्नेले खेललाई ‘प्रभावित’ बनाउने भएपछि खेल अवधिभर दुबो ‘स्ट्यान्डबाई’ राखिने भएको छ । ‘प्रत्येक दिन खेल हुन्छ । दुबोका कारण मैदान र खेललाई असर नपार्न खेल प्रत्येक खेल सकिएपछि मैदान मर्मत काम हुन्छ,’ १३ औं सागको स्थानीय व्यवस्थापन तथा सहजीकरण समिति, पोखरा सदस्य राजेश गुरुङ भन्छन्, ‘साग महिला फुटबल सार्न चलखेल भइरहेको छ । हामी त्यसो हुन दिन्नौं ।’ उनले प्रत्येक खेलपश्चात ‘स्ट्यान्डबाई’ दुबोले रातभर भए पनि मैदान मर्मत गर्ने प्रतिबद्धता व्यक्त गरे ।

मैदानका लागि पहिलोपटक कलकत्ताबाट ल्याइएको बर्मुडा दुबो ‘माटोसहित विदेश पठाउन नमिल्ने’ भारतीय नीतिका कारण भन्सारमा करिब १ हप्ता रोकिएको थियो । जसका कारण ल्याइएका दुबोमा खराबी देखिएकाले फेरि मगाउनु परेको जेभीका प्रोजेक्ट म्यानेजर इन्जिनियर दीपक बरालले जानकारी दिए । पटकपटक गरी अहिलेसम्म करिब ८६ हजार स्क्वायर फिट दुबो मैदानमा बिच्छ्याइसकिएको छ । तर, अधिकांश दुबो सुकेपछि पुनः विस्थापन गर्नु परेको हो ।