समाधान संवाददाता, दुलेगौंडा

तनहुँको भिमाद नगरपालिका ५ मिर्छुलुङमा रहेको एनसेल टावरमा शनिबार राति अज्ञात समूहले आगजनी गरेको छ । राति ११ बजे एनसेल कर्मचारीको मोबाइलमा म्यासेज आएपछि टावर बन्द भएको थियो । आगजनी भएको थाहा पाएपछि कर्मचारीले प्रहरीलाई खबर गरेका थिए ।

इलाका प्रहरी कार्यालय भिमादका प्रमुख प्रहरी नायब निरीक्षक भेषराज रेग्मीले आगजनीबाट टावरका सबै उपकरण जलेर नष्ट जानकारी दिए । बिजुलीको मुख्य मिटरबाट लाइन काटेर आगजनी गरेको रेग्मीले उल्लेख गरे । आगजनीबाट टावरको जेनेरेटर, ब्याट्री तार लगायतका सामग्री जलेका छन् । आगजनी गर्नेको खोजी भइरहेको प्रहरीले जनाएको छ ।