समाधान संवाददाता
पोखरा २७, जेठ

इन्टर्नल हर्नियाको शल्यक्रिया गरेका गण्डकी प्रदेश सांसद रामजी बराल जीवन तेस्रोपटक अस्पतालबाट डिस्चार्ज भएका छन् ।

सांसद बरालको शल्यक्रियापछि पनि पाचनमा थप समस्या भएसँगै पुन २ पटकसम्म प्रतिष्ठानमा भर्ना हुनु परेको उनका छोरा सुजन बरालले बताए । सांसद बरालको जेठ ८ गते शल्यक्रिया भएको थियो । पहिलो पटक जेठ १३ गते डिस्चार्ज भएका उनलाई समस्या आएपछि दोस्रोपटक भर्ना गरिएको थियो । दोस्रोपटक डिस्चार्ज भएका उनी तेस्रोपटक ५ दिन अघि पुन भर्ना भएका थिए ।

मंगलबार डिस्चार्ज हुने बेलामा उनले पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल) को पोस्ट अपरेटिभ वार्डका लागि एक थान गन थर्ममिटर सहयोग हस्तान्तरण गरेकाछन् ।

अस्पतालको पोस्ट अपरेटिभ वार्डका (स्टाफ नर्स) इन्चार्ज पार्वती ढुंगानालाई सांसद बरालले उक्त गन थर्ममिटर सहयोग हस्तान्तरण गरेका हुन् ।

कोरोना संक्रमणको जोखिम बढ्दै गएसँगै गन थर्ममिटरबिना डिजिटल थर्ममिटर प्रयोग गर्दा बिरामी र उपचारमा संलग्न चिकिस्तकको जोखिम बढ्ने सम्भावना देखेर त्यसको न्यूनीकरण गर्ने उद्देश्यले सानो सहयोग गरिएको सांसद बरालले जनाए ।

उपचारमा खटिने डा. नरेन्द्र विक्रम गुरुङ, सुरेश पौडेल, सुरेश थापा, विकास थापा, सहितका चिकित्सक सहितको स्वास्थ्यकर्मीलाई सांसद बरालले धन्यवाद दिएका छन् ।

सांसद बरालले प्रतिष्ठानमा कोरोनाको डेडिकेट आइसोलेसन अस्पताल र आम जनताको उपचार गर्ने गरी दोहोरो भूमिका निभाउने गरी अस्पताल सञ्चालन गर्न नहुने जनाए । कोरोनाको त्रास बढेकोले एउटा मात्र सेवामा केन्द्रित गर्न सांसद बरालको भनाइ थियो ।
अस्पतालको सेवा राम्रो भएको प्रशंसा गर्दै सांसद बरालले अस्पतालमा सरसफाई, कर्मचारी व्यवस्थापन सहितका धेरै कुरा सुधार गर्नुपर्ने अस्पताल प्रशासनलाई सुझाव दिएकाछन् ।