समाधान संवाददाता, पोखरा

युनाइटेड क्लब पोखराको अध्यक्षमा राजु श्रेष्ठ चयन भएका छन् । शुक्रबार सम्पन्न क्लबको ११ औं वार्षिक साधारण सभा तथा पाँचौ अधिवेशनले राजु श्रेष्ठलाई सर्वसम्मतले अध्यक्षमा चयन गरेको हो ।

अधिवेशनबाट क्लबको प्रथम उपाध्यक्षमा लोकबहादुर थापा, द्वित्तीय उपाध्यक्षमा गणेश तिमिल्सिना, महासचिवमा शान्तबहादुर थापा, कोषाध्यक्षमा सूर्यबहादुर वानिया, सचिवमा दिनेश सुनार र सहकोषाध्यक्षमा पूर्णकला पोखरेल चयन भए ।

त्यसैगरी सदस्यहरुमा सीमा राई गुरुङ, जयराम आचार्य, सन्तोष कार्की, पूर्णकुमार श्रेष्ठ, विष्णुकुमार गुरुङ, देवानी सुवेदी, शिव थापा र चन्द्रा पराजुली चयन भएका छन ।

अधिवेशनपछि नवनिर्वाचित अध्यक्ष राजु श्रेष्ठले युनाइटेड क्लबले लिएको उद्देश्यमानै आफ्नो कार्यसमिति लागि पर्ने प्रतिवद्धता जनाए ।

युनाइटेड क्लबले स्थापना कालदेखि शिक्षा, स्वास्थ्य, खेलकुद, पर्यटन प्रवद्र्धनका लागि पोखरामा चिडियाखाना निर्माण, सेती नदी संरक्षण र विपद व्यवस्थापन अन्तर्गत प्राकृतिक विपत्तिमा परेकाहरुलाई सहयोग गर्दै आइरहेको र सोही अनुरुप अगाडि बढ्दै आफ्नो कार्यकालमा असहाय जेहेन्दार विद्यार्थीहरुलाई क्लबले अध्ययन गराउने लक्ष्य रहेको बताए ।

त्यसैगरी युनाइटेड क्लबको पहलमा यतिबेला पोखराको लेखनाथस्थित पचभैयामा निर्माणाधीन पोखरा जुलोजिकल पार्कमा केही विवाद उत्पन्न भई अदालती प्रक्रियामा रहेको र आफ्नो कार्यकालमा उक्त विवाद सुल्झाउनका लागि प्रत्यत्न गर्ने बताए ।

क्लबले लेखनाथमा आफ्नो भवन निर्माणका लागि जग्गा समेत लिइसकेको र यही कार्यकालमा क्लब विस्तारसँगै क्लबको आफ्नै भवन निर्माणको लागि पहलकदमी थाल्ने नवनिर्वाचित अध्यक्ष श्रेष्ठले बताए ।

यसैविच निवर्तमान अध्यक्ष लालकाजी गुरुङले आफ्नो कार्यकालमा विपद ब्यवस्थापन कोष स्थापना गरेको र आपद विपदमा परेकोलाई सहयोग गर्न क्लब सक्षम रहेको बताए ।

त्यसैगरी क्लबले आफ्नो कार्यकालमा विश्व महामारीको रुपमा फैलिएको कोरोना भाइरस नियन्त्रणका लागी गण्डकी प्रदेश सरकार, पोखरा महानगरपालिका, वडा नम्बर १० र १२ लाई समेत सहयोग गरेको र हालै पोखरा २७ अर्चलेमा ५ रोपनी जग्गा खरिद गर्न समेत सफल भएको बताए ।

हालै खरिद गरिएको जग्गामा क्लबको उद्देश्य बमोजिम काम गर्न समेत आफू सदैव तयार रहेको उनको भनाइ थियो ।

यसैबीच अधिवेशन पूर्व सम्पन्न साधारण सभामा कोषाध्यक्ष गणेश तिमिल्सिनाले आर्थिक वर्ष २०७६÷७७ को आर्थिक प्रतिवेदन र महासचिव शान्तबहादुर थापाले आर्थिक वर्ष २०७६÷७७ को कार्यप्रगति विवरण प्रस्तुत गरेका थिए ।