जोमसोम— मुस्ताङको थासाङ—२ नाउरिकोट माथिको उच्चलेकको चौरी खर्कमा रहेका १४ याक÷चौरी बेपत्ता भएका छन् ।आईतबार धौलागिरि क्षेत्रको पानापाथी हिमालबाट उर्लिएर आएको भिषण हिम पहिरोका कारण सो क्षेत्रको सित्लुङ खर्कमा रहेका दुई गोठका १४ याकचौरी बेपत्ता भएको कोवाङ प्रहरी चौकीले जनाएको छ ।
हिम पहिरो गएको पानपाथी हिमालको फेंदमा ३ वटा चौरी गोठ थियो ।त्यहा स्थानीय सकेन्द्र गौचनको ६५ ,भीम थकालीको ६५ र शुशिला गौचनको ४० वटा याक चौरी थिए । आईतबार बिहानैबाट बेपत्ता याकचौरीको उक्त क्षेत्रमा खोज तलास गर्ने क्रममा स्थानीय सकेन्द्र गौचनको ५८ र भीम थकालीको ५८ वटा याकचौरी सम्पर्कमा आएको कोवाङ प्रहरी चौकीका ईञ्चार्ज नेत्र जिटीले जानकारी दिए । तर सकेन्द्र र भीम थकालीको दुई गोठका १४ याकचौरी अझै फेला नपरेको उनले जानकारी दिए ।

अहिले हिम पहिरो ग्रस्तक्षेत्रबाट प्रहरी टोली फिर्ता आएका छन् भने चौरी धनीहरु भने गोठ भएको स्थानमा गएका छन् । स्थानीय चौरी पालक शुशिला गौचनको याकचौरी भने मंगलबार मात्र खोजी गर्ने जनाईएको छ । चौरी धनी तथा प्रहरीको संयुक्त टोली हिम पहिरो प्रभावित क्षेत्रमा खोजी गर्दा बेपत्ता याकचौरी फेला पर्न नसकेको हो । प्रहरीका अनुसार बेपत्ता याकचौरी हिमपहिरोमा पुरिएर वा हताहत भएर जंगलतर्फ लागेको हुनसक्ने अनुमान गरेको छ । शुशिला गौचनको याकचौरीको अवस्था खुल्न सकेको छैन ।गर्मीयामको मौसममा उच्चलेंकमा र हिउँदयामको मौसममा बेसी स्थान्तरण गरिने याकचौरीहरु चिसो बढेसंगै बस्ती ल्याउने तैयारी थियो ।तर ,अकल्पनीय रुपमा हिम पहिरो गएपछि स्थानीय पशुपालक चिन्तित बनेका छन् ।

आईतबारको हिम पहिरो अहिले सम्मकै भयावह भएको स्थानीय बताउछन् ।जाडो मौसममा हिमालको हिउ जमेर बस्नु पर्ने अवस्थामा हिमपात भएकोले हिमाली क्षेत्रको तापक्रम समेत वृद्धि भएको हुनसक्ने कतिपयको ठम्याई छ । हिम पहिरोले बोक्सी खोला र नाउरिकोट क्षेत्र माथिको लेंक र खोलामा बरफको चाङ लागेको प्रहरी ईञ्चार्ज जिटीले उल्लेख गरे । उनका अनुसार सो क्षेत्रको खर्कमा रहेका सल्ला र धुपीका रुखहरु हिम पहिरोले लतारिएर ढल्न पुगेका छ । हिम पहिरोले खोलाको पानी बग्ने स्थानमा बरफको चाङ थुप्रिएको छ भने खर्कको जंगलबाट हिम पहिरोसंगै माटो समेत उभारिएको छ ।
हिम पहिरोबाट हताहत भई घाईते भएका ३ जनालाई सोमबार थप उपचारका लागि पोखरा रिफर गरिएको छ । उनीहरुलाई तारा एअरको जहाजमा राखेर पोखरा उद्दार गरिएको हो ।हिम पहिरोले कोवाङमा अवस्थित जनआर्दश अमरसिंह माध्यमिक विद्यालयका झन्डै १ सय ६० बिद्यार्थीको भागदौड चलेको थियो । बिद्यालयको दोश्रो पिरियड चल्दै गर्दा हिम पहिरो ठुलो आवाज गुन्जिएरपछि बिद्यार्थी र शिक्षकमा भागदौड सुरु भएको थियो । बिद्यालयमा हताहत हुदा ३ शिक्षक र ८ बिद्यार्थी घाईते भएका थिए । जोमसोम अस्पतालमा रहेका ८ घाईतेका अवस्था सामान्य रहेको छ ।