जोमसोम—

मुस्ताङमा तेश्रो पटक पूनः हिमपात भईरहेको छ ।पश्चिमी वायुको प्रभावसंगै आईतबार बिहान ११ बजेदेखि हिमपात भईरहेको जिल्ला प्रशासन कार्यालय मुस्ताङले जनाएको छ ।
हिउँदयाम सकिएर गर्मीयाम सुरु हुने बेला मुस्ताङमा हिमपात भएको हो ।हिमपातले मुस्ताङका डाँढाकाँढा पुरै सेताम्मे भएका छन् भने बस्तीमा समेत हिउँ जम्न सुरु गरेको छ ।जिल्लाको लोमान्थाङ,लोघेकर दामोदरकुण्ड,वारागुङ मुक्तिक्षेत्र,घरपझोङ र थासाङ गाउँपालिका विभिन्न स्थानमा अहिले हिमपात भईरहेको मुस्ताङका सहायक प्रमुख जिल्ला अधिकारी रामचन्द्र ढकालले जानकारी दिए ।

हिमपात भएसंगै मुस्ताङमा चिसो अत्यधिक बढेको छ भने बिद्यालय वालवालिकाहरुको पढन पाठनमा समेत समस्या पर्न थालेको छ । मुस्ताङका तीन स्थानीय तहका बिद्यालय फागुन १ गतेदेखि सञ्चालनमा आएका छन् । उपल्लो मुस्ताङका बिद्यालय भने घुम्ती कक्षाका लागि बेसीमा छन् ।
मुस्ताङमा गत पुस १४ र माघ २० गते भारी हिमपात भएाको थियो ।लगातार हिमपात भएमा स्थानीय जनजिवन प्रभावित हुनुको साथै बेनी—जोमसोम ,जोमसोम—मुक्तिनाथ र उपल्लो मुस्ताङको सडक यातायात अवरुद्ध हुने निश्चित छ । मुस्ताङमा हिमपात भएसंगै मानिसहरु घरभित्रै बस्न बाध्य भएका छन् ।