पोखरा ।
गण्डकी प्रज्ञा प्रतिष्ठानको आयोजनामा पोखराको दीपमा गुरुङ मातृभाषा प्रशिक्षण सुरु भएको छ । तमु प्ये ल्हु संघ केन्द्रीय समितिको सहकार्यमा आयोजित प्रशिक्षण उर्जा, जलस्रोत तथा खानेपानी मन्त्री हरिशरण आचार्यले सुरुआत गरे ।

मन्त्री आचार्यले मातृभाषाको महत्व ठुलो हुने भएकाले सबै मिलेर मातृभाषालाई जोगाउनुपर्ने बताए । गण्डकी प्रज्ञा प्रतिष्ठानले अभियानकै रुपमा मातृभाषालाई संरक्षण गर्न गण्डकी प्रदेशका विभिन्न ठाउँमा प्रशिक्षण कार्यक्रमको आयोजना गरेकोमा उनले खुसी गरे ।

तमु प्ये ल्हु संघ केन्द्रीय समितिका अध्यक्ष हितकाजी गुरुङको अध्यक्षतामा भएको कार्यक्रममा गण्डकी प्रज्ञा प्रतिष्ठानका उपकुलपति गोरे गुरुङ, सदस्य सचिव मनकुमार श्रेष्ठ, प्राज्ञ कृष्णप्रसाद पौडेल, तमु प्ये ल्हु संघ कास्की अध्यक्ष निमबहादुर गुरुङ, ओमबहादुर गुरुङ, हर्क गुरुङ लगायतले बोलेका थिए ।

२७ प्रशिक्षार्थीलाई १ महिनासम्म ओमबहादुर गुरुङले भाषा सिकाउने छन् । गण्डकी प्रज्ञा प्रतिष्ठानको सहयोगमा स्थापित जाति विस्तापित भाषा नाममा प्रशिक्षण चलिरहेको छ । जस अनुसार तामाङ, दुरा र नेवारी भाषाको प्रशिक्षण भइसकेको छ । आगामी आर्थिक वर्षमा समेत मातृभाषा प्रशिक्षण कार्यक्रमलाई निरन्तरता दिने योजना बनाएको गण्डकी प्रज्ञा प्रतिष्ठानले जनाएको छ । प्रतिष्ठानले आगामी असार १० देखि १२ गतेसम्म ‘प्रज्ञा उत्सव’ नामक बृहत कार्यक्रम आयोजना गर्ने प्रतिष्ठानका सदस्य सचिव मनकुमार श्रेष्ठले जानकारी दिए ।