पोखरा ।
सेतीगंगा टोल विकास संस्था, सौभाग्य महिला समूह तथा नयाँ बजार रामघाट धार्मिक क्षेत्र विकास समितिको सक्रियतामा बनेको सेतीगंगा पाटी फल्चा उदघाटन गरिएको छ । आइतबार आयोजित कार्यक्रममा पोखरा महानगरपालिका वडा नं ९ का वडाध्यक्ष दीपेन्द्र मर्सानीले फल्चा उद्घाटन गरे ।

रामघाट क्षेत्रमा हरिबोधनी एकादशीका दिन फूल तार्न जाने भक्तजनबाट संकलित रकम तथा विभिन्न सहयोगी र दाताबाट प्राप्त ३ लाख लागतमा फल्चा निर्माण गरिएको हो । मलामी गई फर्किएकाहरुको विश्रामका लागि फल्चा अर्थात पाटी बनाइएको हो ।
वडाध्यक्ष मर्सानीले रामघाट क्षेत्रलाई सुन्दर बनाउन र मृत्यु संस्कारका लागि रामघाट आउनेलाई फरक अनुभूति दिलाउन फल्चाको निर्माणसँगै रामघाट क्षेत्रको सौन्दर्यकरण अभियान सुरु गरिएको जानकारी दिए । उनले वडाबासीको घरदैलोमा पुगेर उनीहरुको सुखदुखमा साक्षात्कार गर्न निरन्तर सक्रिय रहेको उल्लेख गरे ।

रामघाट धार्मिक क्षेत्र विकास समिति अध्यक्ष रोशन मानन्धरले यस क्षेत्रलाई सुन्दर र सधै हराभरा बनाउने उद्देश्यले फू रोप्ने कामका साथै सरसफाइ अभियान सञ्चालन गरिएको बताए । समिति उपाध्यक्ष उत्तम जोशीले आफन्त विछोडिएको पीडा र दुःखमा रहेकाहरुको मनमा शान्ति दिलाउन रामघाट धार्मिक क्षेत्रमा सौन्दर्यकरण कार्यक्रमको अवधारणा ल्याइएको बताए ।